Bıyl sáýirde Qazaqstanda ınternetke qoljetimdiligi bar 17 mln-nan asa uıaly baılanys abonenti tirkeldi, bul byltyrǵyǵa qaraǵanda 5,7%-ǵa, al on jyl burynǵy kórsetkishke qaraǵanda 83,1%-ǵa kóp.
Sondaı-aq elimizde 2,8 mln abonent ınternetti paıdalanady, bir jylda plús 4,9%, on jylda olardyń sany 2 ese ósken, dep habarlaıdy Almaty-akshamy.kz Elorda.info-ǵa silteme jasap.
Bul Qazaqstanda ınternettiń ený deńgeıi damyǵan eldermen salystyrǵanda joǵary ekenin kórsetedi, ári elektrondy komersıany ilgeriletý úshin tamasha múmkindik bolyp sanalady.
Qazirdiń ózinde biz barlyq naryqtyq formasıada onlaın rejımge qarqyndy ótý prosesin baıqap otyrmyz. Sońǵy jyldary qolma-qol aqshasyz tólemder kólemi de birneshe ese ósken. 2022 jylǵy birinshi toqsannyń qorytyndysy boıynsha bul soma 19,1 trln teńgege jetti, bul ótken jylmen salystyrǵanda 1,5 esege artyq.
Sonymen qatar bıyl bir toqsanda qolma-qol aqshasyz tólemder kólemi tolyq 2019 jyldyń kórsetkishinen 43%, al 2018 jyldyń kórsetkishinen 28 ese artyq boldy.
Internet jáne uıaly telefon arqyly jasalǵan onlaın-tólemderge qolma-qol aqshasyz esep aıyrysý kóleminiń 84,2% teń. Mundaı dınamıka – jalpy álemdik trend. Nasdaq málimetinshe, 2040 jylǵa qaraı barlyq satyp alýlardyń 95% ınternette jasalady.
Qazaqstanda qolma-qol aqshasyz tólemder kóleminiń ulǵaıýymen qatar elektrondy saýda kórsetkishteri de ósip jatyr. Eger 2018-2019 jyldary e-Trading úlesi 2,9% jáne 3,8% bolsa, 2020 jyly bul kórsetkish 3 ese ósip, 9,7% jetti.
Sondaı-aq eger taýarlar men qyzmetterdi onlaın satyp alǵan ınternet paıdalanýshylardy esepke alsaq, olardyń úlesi 2019 jyly 15,6%-dan 2020 jyly 17,7%-ǵa deıin ósti.
Búginde ınternetten kez-kelgen taýardy satyp alýǵa bolady, ıaǵnı kúndelikti turmysqa qajet qarapaıym zattardan bastap, sırek kezdesetin jáne eksklúzıvti taýarǵa deıin.
Qazaqstanda ınternette eń kóp satylatyn taýarlar: kıim, aıaq-kıim, sport taýarlary, azyq-túlik, úıde paıdalanýǵa arnalǵan taýarlar, dári-dármek, telekomýnıkasıa qyzmetteri, elektrondy jabdyqtar, qarjylyq jáne saqtandyrý qyzmetteri, kompúterlik taýarlar jáne taǵy basqa.
Sonymen qatar qazirgi tańda onlaın kólik satyp alýǵa, ıpoteka rásimdeýge de múmkindik bar.