Ekologtardyń boljamy.
Qazaqstandyq ekologtar ústimizdegi jyly kıik sany bir mıllıonnan asady, dep boljap otyr. 2021 jyldyń qorytyndysy boıynsha elimizde 842 myń kıik bar, dep habarlaıdy Almaty-akshamy QazAqparatqa silteme jasap.
Mamannyń aıtýynsha, kıikterdiń tóldeýi jyl saıyn sáýirdiń sońynan mamyrdyń ortasyna deıin jalǵasady.
«Biz jyl saıyn kıikterdiń esebin júrgizemiz. Búginge deıin elimizde albınos kıik tóliniń týý jaǵdaıy tirkelmedi. Qazaqstanda keń taraǵan úsh kıik túri bar. Ol ústirt kıikteri, Betpaqdala jáne Oral kıikteri. Ótken jyldyń esebi boıynsha elimizde 842 myń kıik bar. Bıyl atalǵan kórsetkish arta túsedi degen úmittemiz. Shamamen 1,2 mln kıikke jetedi degen boljam bar. Jalpy álem boıynsha kıikterdiń 90 paıyzy bizdiń elimizge tıesili», - deıdi «Ohotzooprom» respýblıkalyq mekemesiniń bólim basshysy Azamat Aqaev.
Jyl saıyn kıikter esebi olar tóldep bolǵannan keıin júrgiziledi. Al onyń qorytyndysy jyl sońynda daıyn bolady.
«Kıikter tóldep jatqanda kedergi keltirýge bolmaıdy. Iaǵnı olardy mazalamaý kerek. Sol sıaqty kıikterge sanaq júrgizý ǵylymı uıymdar bekitken ádiske sáıkes júzege asyrylady. Sanaq negizinen tikushaqtyń kómegimen júrgiziledi. Kıikterdiń tóldeý prosesin quzyrly organdar jáne salalyq ǵylymı mekemelerdiń ókilderi men mamandary qadaǵalaıdy. Jaǵdaıdy jyl boıy zerdelep, jyl aıaǵynda onyń qorytyndysyn shyǵarady», - dedi maman.
«Ohotzooprom» ókiliniń málimdeýinshe, elimizde jyl sanap kıikterdiń kóbeıýi baıqalady.
«Baqylaý men qabyldanyp jatqan sharalarǵa qaramastan brakonerlik faktiler bar. Bizdiń ınspektorlar kıik aýlaýshylarmen kúresti táýlik boıy júrgizedi. Kıik aýlaý – ol qylmys. Qylmystyń aldyn alý maqsatynda quzyrly organdarmen birlesip tıisti sharalar qabyldanyp, qoldanysqa enip jatyr», - deıdi Azamat Aqaev.