Alaıaqtar qazaqstandyqtardy aldaýdyń jańa ádisin oılap tapty.
Áleýmettik jelide alaıaqtar qazaqstandyqtardy tanymal kompanıalardyń aksıalaryna ınvestısıa salýǵa shaqyryp jatyr, dep habarlaıdy Almaty-akshamy.kz
Qazaqstandyq mys óndirýshi KAZ Minerals kompanıasy alaıaqtyq faktileriniń kóbeıgeni týraly málimdedi.
Bul joly alaıaqtar qazaqstandyqtardyń derbes derekteri men jeke jınaǵyn qolǵa túsirýge tyrysyp, kompanıanyń atyn paıdalana bastaǵan. Ásirese, áleýmettik jelide belsendilik artyp tur. Munda jalǵan jarnamaǵa siltemeler men jazbalar jarıalanyp jatyr, dep málimdedi KAZ Minerals baspasóz qyzmeti.
«Sońǵy ýaqytta alaıaqtar qarjy ınstıtýttarymen shektelmeı, ekonomıkanyń basqa sektoryndaǵy tabysty qazaqstandyq brendterdi, sonyń ishinde KAZ Minerals kompanıasynyń ataýyn halyqty aldap soǵý maqsatynda qoldanyp jatyr», - dedi KAZ Minerals tobynyń korporatıvtik baılanys departamentiniń basshysy Maqsut Japabaev.
Ol kompanıa jaqynda ǵana bırjadan ketkenin, jeke menshikke ótkenin málimdedi. Sondyqtan qazir onyń aksıalary erkin aınalymda joq.
«Biz kompanıanyń azamattarǵa arnalǵan ınvestısıalyq baǵdarlamalardy júzege asyrmaıtynyn resmı túrde málimdeımiz. Osy oraıda qazaqstandyqtardy saq bolýǵa, aqparattyq qaýipsizdik erejelerin saqtaýǵa, jeke derekterin eshkimge habarlamaýǵa, kompanıanyń resmı resýrstarynda kúmándi aqparatty qaıta-qaıta tekserýge shaqyramyz», - dedi Maqsut Japabaev.
Kompanıa tıisti vedomstvolarǵa, sonyń ishinde Qazaqstannyń ishki ister mınıstrligi jáne sıfrlyq damý, ınovasıalar jáne aeroǵarysh ónerkásibi mınıstrligine úndeý hattar daıyndap jatyr.