Turaqty monıtorıń júrgizilýde.
Otandyq mamandar kóktemde bolatyn sý tasqyny kezeńine daıyndalyp jatyr, dep habarlaıdy Almaty-akshamy.kz.
«Respýblıka aýmaǵyndaǵy sý tasqynyna qarsy QR EGTRM Sý resýrstary komıteti «QazSýSHar» RMK-men birlesip birqatar aldyn alý sharalaryn júrgizýde. Bul týraly komıtet tóraǵasy Nurlan Aldamjarov aıtty», - delingen Ekologıa mınıstrliginiń baspasóz qyzmetiniń habarlamasynda.
Onyń sózinshe, Qazaqstannyń barlyq óńirlerinde sý tasqynyn ótkizýge gıdrotehnıkalyq qurylystar daıyndaldy, táýlik boıy kezekshilik kestesi bekitilgen.
«Qazirgi ýaqytta baseındik ınspeksıalarmen birlesip el aýmaǵyndaǵy sý tasqyny men jaǵdaıǵa turaqty monıtorıń júrgizilýde. Osy kezeńde eldi mekenderdiń, ásirese, sý basý qaýpi bar jerlerdiń qaýipsizdigin qamtamasyz etý mańyzdy. Búgingi tańda gıdrotehnıkalyq qurylystar shtattyq rejımde jumys isteýde jáne aldaǵy sý tasqynyna daıyn», - dedi Sý resýrstar komıtetiniń tóraǵasy Nurlan Aldamjarov.
Mamandardyń aıtýynsha, elimizde 300-den astam úlkendi-kishili sý qoımasy bar. Onyń 86-sy «QazSýSHar» RMK-ǵa tıesili. Kásiporynnyń balansyndaǵy sý qoımalary orta eseppen 40%-ǵa toltyrylǵan.
«Gıdrotehnıkalyq nysandy toltyrý kestesi sý tasqyny kólemine jáne onyń ótý ýaqytyna, paıdalanýshylardyń sý tutyný kólemine jáne baseınaralyq aýdarymdarǵa baılanysty. Paıdalaný erejelerine sáıkes sý qoımalarynyń kólemin azaıtýǵa jol berilmeıdi, óıtkeni olar ekonomıkanyń barlyq salalary men qorshaǵan ortanyń qajettilikterin qamtamasyz etedi», - dedi tóraǵa.
Mamandar tótenshe jaǵdaı týyndaǵanda jáne qolaısyz sý tasqyny bola qalǵanda, óńirlerde qajetti avtokólik, arnaıy tehnıka, ınertti materıaldar, sorǵy agregattary daıyn ekenin aıtyp otyr.