Qazaqstannyń depozıtterge kepildik berý qory men Marketıń jáne sosıologıalyq zertteýler ınstıtýty birlesip, áıelderdiń qarjylyq tártibi týraly qyzyqty saýalnama júrgizdi. Zertteýge 18 ben 65 jas aralyǵyndaǵy 1980 áıel qatysqan. Aqshamnews.kz habarlaýynsha, zertteý nátıjeleri áıelderdiń aqshany saqtaýdaǵy ádetteri men maqsattaryn kórsetedi.
Zertteý qorytyndysyna súıensek, áıelderdiń 34%-y jıǵan-tergenin bankte saqtaıdy eken. Bul salymshylardyń basym bóligi – 81% teńgemen depozıt ashýdy tańdaǵan. Al qalǵandary shetel valútasyn tańdaıdy.
Saýalnamaǵa qatysqan 30 jasqa deıingi qyzdardyń 14 paıyzy baspana alý úshin, 17 paıyzy qarjylyq qor jasaý úshin jáne 5 paıyzy bıznes ashý úshin aqsha jınaıtynyn málimdegen.
Al 30 jastan asqan áıelderdiń 12 paıyzy úı satyp alýdy josparlasa, 16 paıyzy qarjylyq qıyndyqtardyń aldyn alý maqsatynda aqsha jınaıtynyn kórsetken.
Zertteýge qatysqandardyń 12 paıyzy múlde bankke aqsha salmaıdy. Olar óz qarjysyn bızneske, jyljymaıtyn múlikke, baǵaly qaǵazdarǵa jáne baǵaly metaldarǵa ınvestısıalaıdy.
Zertteýge qatysqandardyń kóbi otbasyly jáne joǵary bilimi nemese ǵylymı dárejesi bar áıelder eken. Olar kóbinese saýda, qyzmet kórsetý, bıznes jáne óndiris, sondaı-aq ónerkásip salasynda jumys isteıdi. Mamandar zertteý nátıjelerine qarap, qazaqstandyq áıelderdiń qarjylyq saýatynyń artyp kele jatqanyn atap ótýde.