Ekologıa jáne tabıǵı resýrstar mınıstri Erlan Nysanbaev Úkimet otyrysynda kóktemgi kezeńge arnalǵan aýa raıy boljamynyń jańartylǵan derekterin usyndy.
Ol naýryz, sáýir aılary ádettegiden jyly bolady dep kútilip otyrǵanyn ári elimizdiń basym bóliginde jaýyn-shashyn kóp túsetinin atap ótti. Bul kóktemniń tez kelýine jáne sý tasqyny qaýpiniń artýyna yqpal etedi, dep habarlaıdy aqshamnews.kz.
Sý tasqyny qaýpi joǵary óńirlerdiń qatarynda: Aqtóbe, Qostanaı, Qaraǵandy, Aqmola, Soltústik Qazaqstan, Shyǵys Qazaqstan oblystary jáne Ulytaý jáne Abaı oblystary bar. Qaýiptiligi ortasha óńirler: Almaty, Jetisý, Jambyl, Batys Qazaqstan jáne Atyraý oblystary.
Tasqyn qaýpi tómen óńirler: Pavlodar, Mańǵystaý, Túrkistan jáne Qyzylorda oblystary.
«Bıyl Qazgıdromet alǵash ret ár oblys boıynsha egjeı-tegjeıli anyqtamalar daıyndady. Bul anyqtamalarda gıdrologıalyq beketter boıynsha sý deńgeıiniń jáne aǵysynyń kútiletin eń joǵary mánderi, aǵyn kólemi jáne sondaı-aq qaýip aımaǵynda ornalasqan eldi mekenderdi kórsete otyryp, boljamdy bastalý kúnderi kórsetiledi. Sondaı-aq ótken aptadan bastap Qazgıdromet apta saıynǵy gıdrologıalyq boljamdardy shyǵara bastady. Gıdrometeorologıalyq jaǵdaı kúrt ózgeretin bolsa «Qazgıdromet» eskertýlerdi 2-3 táýlik buryn habarlaıdy»,
— dep atap ótti Erlan Nysanbaev.