Qurylys shyǵyny shekteýli bolady.
Mundaı sheshim búdjet qarajaty esebinen salynatyn obektilerge qatysty bolady, dep habarlaıdy Almaty-akshamy.kz Almaty.tv cilteme jasap.
IIDM sybaılas jemqorlyq táýekelderin joıý maqsatynda qurylys salasyn sıfrlandyrý jáne avtomattandyrý jumysyn júrgizip jatyr.
«Qazirgi ýaqytta «E-Qurylys» aqparattyq júıesi ázirlendi. Ol qazanshuńqyr qazýdan bastap paıdalanýǵa bergenge deıingi qurylys prosesin onlaın-rejımde baqylaýǵa múmkindik beredi. Júıege memlekettik sáýlet-qurylys baqylaý organdary qosylyp, tehnıkalyq qadaǵalaýshylar men ınjenerlik-tehnıkalyq qyzmetkerlerdiń barlyq tizilimi júktelgen. Sondaı-aq tehnıkalyq qadaǵalaýshylardyń barlyq esebi beriledi», - delingen habarlamada.
«E-Qurylys» júıesi tehnıkalyq qadaǵalaý sarapshylaryn obektiler boıynsha baqylap, olardyń túrli óńirde qyzmet kórsetýine jol bermeıdi. Sondaı-aq, jobadan aýytqyp ketse nemese jumys tolyq kólemde oryndalmasa, olardy qabyldamaıdy.
«Qurylys jobalarynyń smetalyq qunyn jasandy jolmen kóterý táýekelderin azaıtý úshin onlaın-rejımdegi «Onlaın kálkýlátor» júıesi ázirlendi. Bul óńirge jáne obektiniń tehnıkalyq ólshemderine baılanysty jobanyń shekti mánin avtomatty túrde eseptep, belgileýge múmkindik beredi», - delingen mınıstrlik taratqan habarlamada.
Sondaı-aq memlekettik búdjet qarajaty esebinen qarjylandyrylatyn áleýmettik obektiler jáne turǵyn úıler úshin shekti qunyn belgileý josparlanyp otyr. Iaǵnı, qurylys shyǵyny shekteýli bolady.
Budan basqa, búginde mınıstrlik akredıtteý boıynsha memlekettik qyzmetterdegi sybaılas jemqorlyq táýekelderin joıdy. Olar tolyǵymen avtomattandyrylǵan jáne 20 mınýt ishinde nátıjesin kompúter beredi.
Sonymen qatar, qurylys jumystaryna lısenzıa berý kezinde endi tikeleı baılanys bolmaıdy. Tehnıkalyq qadaǵalaý, tekserý jáne jobalardy saraptaý boıynsha mamandardy atestattaýdyń biryńǵaı júıesinde testileý fýnksıasy engizildi. Onda synaqtan ótetin adamdy aýystyrýǵa jol berilmeıdi jáne testileý nátıjelerine bógde eshkim áser ete almaıdy. Úrdisti bıyl tolyǵymen avtomattandyrý josparlanǵan.
Qosymsha ruqsat berý qujattary boıynsha memlekettik fýnksıalardy mindetti túrde saqtandyra otyryp, ózin-ózi retteýge berý ázirlenip jatyr. Iaǵnı, óz qyzmetin ózderi retteıtin uıymdar mamandardy attestasıalap, lısenzıalar beredi jáne olardyń qyzmeti úshin jaýapty bolady.
IIDM qurylys salasyndaǵy sybaılas jemqorlyqty joıý jumystaryn basym baǵytta jalǵastyra beredi.