Soltústik Qazaqstan oblysynda Memleket basshysy jarıalaǵan «Taza Qazaqstan» ekologıalyq aksıasy aıasynda «Balyq aýlaý torlary teńizi. 1-bólim» derekti fılminiń ekokórsetilimi ótti. İs-sharany oblystyq Jastar resýrstyq ortalyǵy eriktilerdiń front-ofısimen birlesip uıymdastyrdy.
Kınokórsetilimniń maqsaty – jastardyń ekologıalyq saýattylyǵyn arttyrý, sý aıdyndarynyń lastanýy men antropogendik áserdiń saldaryna nazar aýdartý. Fılm Kaspıı teńiziniń ekologıalyq máselelerin kóterip, tabıǵatty qorǵaýda ár adamnyń jaýapkershiligi mańyzdy ekenin kórsetedi.
«Vızýaldy óner men ashyq dıalog arqyly tabıǵatqa jaýapty kózqaras qalyptastyrý – basty maqsatymyz. Mundaı fılmder tek aqparat bermeı, naqty áreketke shabyt beredi», – dedi SQO eriktiler front-ofısiniń úılestirýshisi Ǵabbas Almagúl.
Kórsetilimnen keıin stýdentter men eriktiler «suraq–jaýap» formatynda qaldyqtardy suryptaý, plasıkti qaıta óńdeý, jergilikti eko-bastamalarǵa qatysý máselelerin talqylady. Qatysýshylar jeke ekologıalyq izdi azaıtý joldary men óńirdegi tabıǵatty qorǵaý sharalary týraly suraqtar qoıdy.
Stýdent Dınara Taımanova: «Fılmdi kórgen soń ári muńaıdym, ári shabyttandym. Lastanýdyń aýqymy qorqynyshty. Biraq tazalyqqa shyǵý sıaqty shaǵyn qadamdar da bireýdiń ómirin saqtap qalýy múmkin ekenin túsindim», – dedi.
Uıymdastyrýshylar vızýaldy format jastarǵa ekologıalyq syn-qaterlerdi jaqsyraq túsinýge kómektesetinin atap ótti. Mundaı kezdesýlerden keıin eriktiler qatary artyp, jastar óz eko-bastamalaryn usynýǵa belsendi kirisedi.
«Biz úshin «jasyl kınoteatr» turaqty dástúrge aınalýy mańyzdy. Aǵartý, tartý jáne naqty áreket arqyly ǵana qorshaǵan ortany birge tazarta alamyz», – dep túıindedi Ǵabbas Almagúl.