Almatyda kásiporyndardyń qorshaǵan ortaǵa yqpalyn azaıtyp jatyr: I sanattaǵy nysandar zıandy zattardy avtomatty túrde baqylaýǵa kóship, jańa ekologıalyq talaptardy mindetti túrde oryndaıdy. Óńirlik komýnıkasıalar qyzmetinde ótken baspasóz konferensıasynda Ekologıa departamenti, Iadrolyq fızıka ınstıtýty men qalanyń iri kásiporyndarynyń ókilderi osylaı dep habarlady.
Ekologıalyq kodeks boıynsha qorshaǵan ortaǵa áser etetin nysandar tórt sanatqa bólinedi. Almatyda ekologıaǵa áseri eń joǵary I sanatqa 18 nysan kiredi, onyń ishindegi ekeýi – úlken kásiporyn. Barlyǵy jyl saıyn qorshaǵan ortany qorǵaý jónindegi is-sharalar jospary qalaı oryndalyp jatqany týraly esep berip otyrýǵa mindetti. Bul josparlarda tabıǵatqa teris áserdi azaıtýǵa baǵyttalǵan jumystar qamtylyp, sondaı-aq zıannyń normatıvteri men qaldyqtyń lımıtterin saqtaýdy baqylaıdy. Qujattar ekologıalyq ruqsattyń búkil qoldanylý merzimine ázirlenip, mindetti saraptamadan ótedi.
Negizgi talaptyń biri – avtomattandyrylǵan emısıa baqylaý júıesin engizý. Mundaı júıeler zıandy zattyń aýqymyn ýaqytyly tirkep, derekti ulttyq bazaǵa avtomatty túrde jiberedi. Bul normatıvter asyp ketse jedel áreket etip, ekologıalyq aqparatty halyqqa ashyq qylýǵa kómektesedi. Almatyda ASM júıesi "AlES" AQ-nyń TES-1, TES-2 jáne Batys jylý kesheninde engizildi. "Almatyjylýjaıenergo" JSHS-niń "Orbıta" qazandyǵynda júıe jobasy ázirlenip, ony synaqtan ótkizip, keler jyly paıdalanýǵa bermek.
Kelesi mańyzdy qadam – kásiporyndardyń eń ozyq tehnologıalarǵa (EOQT / NDT) kóshýi. Mundaı tehnologıalar zıandy aıtarlyqtaı azaıtyp, ekologıalyq standarttardy kóterýge múmkindik beredi. I sanattaǵy nysandar birtindep EOQT negizindegi keshendi ekologıalyq ruqsattarǵa kóshirilip jatyr. Olardyń qatarynda eldegi ekologıaǵa áseri eń joǵary nysannyń biri – "AlES" AQ-nyń TES-2 nysany da bar. NDT engizgen kásiporyndar úshin ekonomıkalyq yntalandyrý qarastyrylǵan: 10 jyl boıy zıandylyǵy úshin tólemnen bosatylady. Jańǵyrtýdan bas tartqan jaǵdaıda tólem mólsherlemesi 2, 4 nemese 8 ese artady. Jańa nysandarǵa da osyndaı talap qoıylady. EO-ǵa múshe elderdiń tájirıbesi kórsetkendeı, NDT engizý nátıjesinde NO₂ shyǵaryndylary 69 %-ǵa, SO₂ – 94 %-ǵa, shań – 94 %-ǵa qysqarǵan. Almatyda júrgizilip jatqan modernızasıa da lastanýdy edáýir azaıtyp, aýanyń sapasyn jaqsartýy tıis.
Baspasóz konferensıasynda qala, ǵylymı uıymdar men bıznes arasyndaǵy birlesken jumystar ekologıalyq baqylaýdy kúsheıtip, Almaty ónerkásibin qorshaǵan orta men turǵyndarǵa barynsha qaýipsiz etetini aıtyldy.