Búginde Almatynyń bilim ordalarynda Jeltoqsan oqıǵasy men Táýelsizdik kúni merekesiniń mán-maǵynasy týraly keshter, kezdesýler ótip jatyr. Sebebi, eńsesi bıik egemen elimizde alańsyz ómir súrip jatqan jas urpaq táýelsizdik uǵymyn tereń uǵynýy tıis.
Sondaı basqosýlardyń biri Naýryzbaı aýdanyndaǵy Rahym Sársenbın atyndaǵy №192 jalpy bilim beretin mektepte kórinis tapty. «Táýelsizdik – máńgilik eldiń tuǵyry» dep aıdar taǵylǵan ádebı-tarıhı keshke muryndyq bolǵan «Jeltoqsan» qozǵalysynyń ardagerleri men olarǵa qoldaý kórsetken aýdannyń «Ájeler alqasy».
Keshtiń baǵdarlamasy óte baı boldy. Mekteptiń jetkinshekteri patrıottyq taqyryptaǵy ánderin shyrqap, tebirenip óleń de oqydy. Oqýshylardyń mektep ómiri men Abaı Qunanbaıuly, Ahmet Baıtursynuly, Maǵjan Jumabaev syndy tulǵalardyń tarıhı beınelerin baılanystyryp daıyndaǵan «Táýelsizdik – erekshe syı» atty teatrlandyrylǵan qoıylymy da áserli shyqty. «Jas sarbaz» mektep klýby «Arý sarbazdar» patrıottyq ánin shyrqady. Naýryzbaı aýdanynyń Jeltoqsan ardagerlerinen qurylǵan hor «Jeltoqsan gımnin» oryndady. Mektep muǵalimderinen quralǵan trıo da ortaǵa shyǵyp, «Umytpa, qazaq!» ánin saldy. Jasandy ıntellekttiń kómegimen Táýelsiz Qazaqstannyń jetistikteri týraly daıyndalǵan beınerolık te oǵan úńilgen ár jetkinshektiń júregine patrıottyq sezim dánin sepkeni anyq.
Ádebı-tarıhı keshtiń meımany – jýrnalıs-pýblısıst, aýdarmashy, baspager, Jeltoqsan taqyrybyn tereń zerttegen qalamger Talǵat Aıtbaıuly janyp turǵan balalarǵa rızashylyǵyn bildirip, osyndaı urpaq turǵanda, erteńimizge alańdaýǵa negiz joq degen lebizin jetkizdi.
Taqyrypqa oraı aıta ketsek, Talǵat Aıtbaıuly – «Jeltoqsan» toptamasynyń qurastyrýshysy. Alǵash shaǵyn jınaqtan bastalǵan eńbegi búginde 17 tomǵa jetip, halqymyzdyń tarıhı murasyna aınaldy.
Sondaı-aq, keshke qatysqan Qalelhan Ádilhanov, Baqyt Baınıazov, Ǵanı Aıýpov, Árip Qablanov, Bolat Tájiǵul, Sáýle Ábdijanova, Kúlásh Qyzaıbaeva, Qarlyǵash Ibraıshına syndy sonaý 1986 jylǵy jeltoqsan yzǵarynda «tońǵan», elge, jerge degen júregin alańǵa alyp shyqqan azamattar da ortaǵa shyǵyp sóılep, esteligin bólisti.
«Men búgin osyndaı basqosýda áriptesterimmen jáne jeltoqsanshy qazaq jastaryn ulyqtap, nasıhattap tom-tomdap kitap jazǵan Talǵat Aıtbaıulymen kezdesip otyrǵanyma óte qýanyshtymyn. Men de 1986 jyly stýdent edim, Aýyl sharýashylyǵy ınstıtýtynda oqyp júrgen armanshyl, jalyndaǵan jas edim. Bizdiń eshqandaı bóten oıymyz bolǵan joq, tek eldi ózimizdiń ulttyń perzenti basqarsa degen tilekpen shyqqan edik alańǵa. Ókinishke oraı bizdiń únimizdi estimedi. Sol jylǵy jeltoqsan óte yzǵarly, sýyq edi. Biraq bizdi tońdyrmaǵan, jylytqan Otanǵa degen súıispenshilik sezimi boldy. Biz jylda Naýryzbaı aýdanynda sol kúnderdi, Jeltoqsan qaharmandaryn umytpas úshin sport oıyndarynan týrnırler ótkizip turamyz. Balalar, sender de bul kúndi ulyqtap júrseńder eken deımiz. Óıtkeni búgingi Táýelsizdik sol jylǵy jeltoqsannan bastalǵan», – dedi «Jeltoqsan aqıqaty» respýblıkalyq qoǵamdyq birlestigi Naýryzbaı aýdandyq fılıalynyń múshesi Sáýle Ábdijanova.