Astanadaǵy «Keleshek» mektepteriniń birinde erekshe bilim berý jobasy – «Tiri tabıǵat» kabıneti ashyldy. Munda oqýshylar sırek kezdesetin baýyrymen jorǵalaýshylar men omyrtqasyz janýarlardy qaýipsiz jaǵdaıda baqylap, zertteı alady. Aldaǵy ýaqytta mundaı kabınetter elordanyń taǵy 100 mektebinde ashylmaq, dep habarlaıdy qala ákimdiginiń resmı saıty.
«Tiri tabıǵat» kabıneti – ekologıalyq mádenıetti qalyptastyratyn, bıologıa jáne jaratylystaný pánderine qyzyǵýshylyqty arttyratyn, zertteýshilik daǵdylardy damytatyn oqý-tájirıbelik orta. Ol oqý baǵdarlamasyna tolyq ıntegrasıalanǵan jáne 5–11 synyptarǵa arnalǵan mańyzdy bilim keńistigine aınalǵan.
Kabınette reptılıalar, órmekshitárizdiler, omyrtqasyzdar jáne jabyq ekojúıe úlgileri ornalastyrylǵan. Barlyq janýarlarǵa qajetti jaǵdaı – terarıýmdar, jaryq, temperatýra jáne ylǵaldylyq júıeleri qamtamasyz etilgen. Bul oqýshylarǵa tiri aǵzalardyń tirshiligin qaýipsiz baqylaýǵa múmkindik beredi.
Jobanyń negizgi ereksheligi – tájirıbe arqyly oqytý. Balalar zerthanalyq jumystar jasaıdy, janýarlardyń minez-qulqyn baqylaıdy, ǵylymı kúndelik júrgizedi. Qazir oqýshylar Iemen hameleony jumyrtqalarynyń ınkýbasıasyn zerttep, damýdyń kezeńderin baqylaýda.
Sonymen birge florarıýmdar qurý jumystary júrgiziledi: oqýshylar shaǵyn ekojúıe jasaıdy, ósimdikter otyrǵyzady, jaryq pen ylǵaldy retteıdi. Bul olarǵa tabıǵı prosester – ylǵal aınalymy, topyraq túzilýi, ósimdikter men mıkroaǵzalardyń ózara baılanysy týraly túsinikti tereńdetýge kómektesedi.
Jalpy, «Tiri tabıǵat» kabıneti – bilim berý, tárbıe jáne ǵylymı-zertteý baǵyttaryn biriktirgen mańyzdy joba. Ol oqýshylardyń bıologıaǵa qyzyǵýshylyǵyn kúsheıtip qana qoımaı, tabıǵatty zertteý men baqylaý daǵdylaryn qalyptastyryp, jas zertteýshilerdiń tanym kókjıegin keńeıtýde.