Darhan Satybaldy merdigerlerdi sharttyq merzimderdiń buzylýynyń saldary týraly eskertti, dep habarlaıdy aqshamnews.kz
Almaty ákimi Darhan Satybaldy jumys sapary barysynda kezekte turǵan azamattarǵa arnalǵan turǵyn úıler men birneshe mektep qurylysynyń barysymen tanysty.
Naýryzbaı aýdanynda 340 oryndyq mektep-ınternattyń qurylysy júrip jatyr. Jobada oqý jáne ákimshilik kabınetter, asqana, baseıni bar sport zaldary, oqý zaly bar kitaphana jáne jatyn bólmeleri qarastyrylǵan 7 blok bar.
Qazirgi ýaqytta árleý jumystary, aýmaqty kógaldandyrý jáne tehnologıalyq jabdyqtardy jetkizý jalǵasýda. Nysannyń daıyndyq deńgeıi – 90%. Alaıda jumys kestesinen 3 aıǵa keıin qalý bar.
Ákim bul mekteptiń erekshe mańyzyn atap ótti, sebebi munda áleýmettik osal sanattaǵy balalar oqyp, turady.
«Nysan bıyl aıaqtalýy jáne sapasy talapqa saı bolýǵa tıis. Áıtpese, biz sot tártibimen shara qabyldaýǵa májbúr bolamyz. Jalpy, qala kásibı quzyreti, zamanaýı tehnıkasy jáne bilikti mamandary bar kompanıalarmen jumys isteýge múddeli. Al sharttyq merzim men qurylys normalaryn buzatyn merdigerler jańa jobalarǵa jiberilmeıdi», — dedi Darhan Satybaldy.
Odan keıin qala ákimi Bostandyq aýdanyndaǵy №73 mektep-gımnazıasyna salynyp jatqan qosymsha ǵımarattyń jumysyn kórdi. Qurylys bıznestiń áleýmettik jaýapkershiligi aıasynda jeke qarajat esebinen júrgizilýde.
Aýdany 6,6 myń sharshy metr bolatyn úsh qabatty ǵımaratta oqý kabınetteri, zerthanalar jáne sport zaly qarastyrylǵan. Bul oqýshylar úshin qaýipsiz jáne qolaıly oqý ortasyn qamtamasyz etedi. Qurylysty keler jyldyń qańtar aıynyń sońynda aıaqtaý josparlanǵan.
Sondaı-aq jumys sapary barysynda ákim Qalqaman-2 shaǵynaýdanyndaǵy kóppáterli turǵyn úılerdiń qurylys alańynda boldy. Joba aıasynda qaladaǵy kezekte turǵan azamattarǵa arnalǵan 594 páter salynýda. Jumysty bıyl aıaqtaý josparlanǵan. Keıin páterler odan ári bólý úshin Komýnaldyq ınfraqurylym jáne turǵyn úı ınspeksıasy basqarmasynyń balansyna beriledi.