Elimizde 2026 jyldyń 1 aqpanynan bastap memlekettik baqylaýdyń jańa tártibi kúshine enedi.
Bul tártip ýákiletti organǵa memlekettik búdjetten qarjylandyrylatyn jáne balalardyń tamaqtanýyn, jatyn ornyn qamtamasyz etý, bilim berý, tárbıeleý jáne saýyqtyrý qyzmetterin kórsetetin uıymdardy qyzmeti bastalar aldynda jáne ony kórsetý barysynda kenetten tekserýge quqyq beredi. Bul baqylaý sharalaryn jedel júrgizýge jáne yqtımal buzýshylyqtardy der kezinde anyqtaýǵa jaǵdaı jasaıdy.
Memlekettik baqylaý «Qazaqstan Respýblıkasyndaǵy balanyń quqyqtary týraly» Zańymen retteledi. Ol baqylaýdyń arnaıy tártibin bekitip, kórsetiletin qyzmetterdiń sapasy men qaýipsizdigine qoıylatyn talaptardy kúsheıtedi.
«Kenetten tekserýlerdi engizý balalardyń qorǵalýyn, memlekettik baqylaýdy kúsheıtedi. Endi ýákiletti organ naqty buzýshylyqtar týraly sıgnal túsken jaǵdaıda óz sheshimimen tekserý taǵaıyndap, nysanǵa dereý shyǵa alady. Sıgnal túsken kezde nysanǵa jospardan tys tekserý júrgiziledi», - dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Aıta keteıik, 4 jeltoqsanda Memleket basshysy «Qazaqstan Respýblıkasynyń keıbir zańnamalyq aktilerine mádenıet, bilim berý, otbasy jáne memlekettik baqylaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy. Jańa normalar 2026 jylǵy 1 aqpanda kúshine enedi.