2025 jyl aıaqtalyp keledi, jyl qorytyndysyn shyǵaratyn ýaqyt ta jetti. Qazaqstandyq regbıshiler regbı-7 boıynsha elimizdiń joǵary lıga komandalary arasyndaǵy ishki chempıonatty da sátti aıaqtady.
Erler komandalary arasyndaǵy júldeli oryndar kelesideı bólindi:
- OF «Azıasport-Dınamo» (Almaty q.)
- PRK «Olımp» (Taldyqorǵan q.)
- «Kaspıı» (Aqtaý q.)
Áıelder komandalary arasynda:
- OF «Azıasport-Dınamo» (Almaty q.)
- SDÚSHOR № 1 (Taldyqorǵan q.)
- «Olımp» (Taldyqorǵan q.)
Regbı-7 boıynsha erler jáne áıelder ulttyq quramalarynyń oıyndarynda aıtarlyqtaı ilgerileý baıqalady. Ońtústik Afrıka Respýblıkasynan kelgen belgili mamandarmen birlese jattyqtyrý bastalǵaly beri eki quramanyń da oıyn deńgeıi edáýir ósip otyr. Áıelder quramasynyń bas jattyqtyrýshysy – Fabıan Djýrıs, al erler quramasynyń jattyqtyrýshylary – Ludwiche Hermanuss pen Johannes Zariascharias.
Erler quramasynyń kapıtany Rasýlmagomed Magomedovtyń aıtýynsha, bıyl tamyz aıynda Ońtústik Afrıka Respýblıkasynda erler jáne áıelder quramalary úshin ótken úsh aptalyq oqý-jattyǵý jıyndarynyń mańyzy erekshe boldy. Jattyǵý jıyndaryn Qazaqstan regbı federasıasy uıymdastyrdy. Bizdiń sportshylar regbı №1 sport túri bolyp sanalatyn elde bolyp qaıtty. Munda balalar regbımen 5 jastan bastap shuǵyldanady, al OAR ulttyq quramasy ár jyldary álem chempıony atanǵan. Jıyn barysynda Qazaqstan komandalary aýqymdy jumys atqaryp, jergilikti myqty ujymdarmen joldastyq kezdesýler ótkizip, baǵa jetpes tájirıbe jınady.
Qazan aıynyń orta tusynda áıelder ulttyq quramasy Shrı-Lankada ótken, Azıa chempıonatyna teńestirilgen Azıa serıasynyń kezeńine qatysty. Jarysta 12 áıelder komandasy baq synady, al Qazaqstan quramasy besinshi orynǵa ıe boldy. Daıyndyqtyń qazirgi deńgeıin eskersek, bul – sózsiz úlken jetistik.
25–26 qazanda Oman elinde ótken “Asia Rugby Emirates Men’s Seven Trophy 2025” halyqaralyq týrnırinde Qazaqstannyń erler quramasy altyn medal jeńip aldy. Azıanyń 16 komandasy qatysqan dodada qazaqstandyq regbıshiler bes machtyń bárinde jeńiske jetti. Qyrǵyzstan, Saýd Arabıasy, Katar, Aýǵanstan, Úndistan komandalaryn senimdi túrde utyp, aıqyn basymdyq kórsetti. Bul jeńis Qazaqstannyń Azıa regbı-7 lıgasynyń joǵary dıvızıonyna qaıta oralýyna jol ashty.
Qarasha aıynyń sońynda erler jáne áıelder quramalary “Emirates Dubai 7s” týrnırine qatysty. Erler komandasy «International Open Men» dıvızıonynda óner kórsetti. Munda Azıa qurlyǵynyń ulttyq jáne klýbtyq komandalary saıysqa tústi. Qazaqstan quramasy 14 komandanyń ishinde 5-orynǵa ıe bolyp, turaqty oıyn órnegin jáne jeńiske degen joǵary jigerin kórsetti.
Áıelder quramasy shaqyrylǵan komandalar men ekinshi quramalar oınaǵan II dıvızıonda synǵa tústi. Olardyń qatarynda Brazılıa, Avstralıa, Qytaı jáne Belgıa komandalary boldy. Qazaqstandyq regbıshi qyzdar 9-oryn alyp, mańyzdy halyqaralyq tájirıbe jınady jáne komandalyq rýhty kúsheıtti.
Sondaı-aq Dubai 7s týrnırinde Qazaqstan atynan óner kórsetken ardagerler komandasynyń qatysýy da nazar aýdararlyq jaıt. Olar 10-oryn ıelendi. Bul da Qazaqstanda regbıdiń barlyq deńgeıde belsendi damyp, myqty sporttyq dástúrler qalyptastyryp kele jatqanyn kórsetedi.
«Biz bıyl barlyq komandalarymyzdyń jetistikterin maqtan tutamyz. Ár oıyn, ár mach sportshylardyń jeke damýy men halyqaralyq arenada qazaqstandyq regbıdiń bedelin nyǵaıtý jolyndaǵy mańyzdy kezeń boldy», – dep atap ótti Qazaqstan regbı federasıasy.
Jınalǵan tájirıbe 2026 jylǵa arnalǵan daıyndyqtyń berik irgetasy bolmaq. Komandalardyń josparyna jańa halyqaralyq týrnırlerge qatysý, oıynshylardyń biliktiligin arttyrý jáne jas sportshylardy qoldaýǵa baǵyttalǵan baǵdarlamalardy júıeli túrde damytý kiredi.
Federasıa Qazaqstan Respýblıkasy Týrızm jáne sport mınıstrligine, Sport jáne dene shynyqtyrý isteri komıtetine jáne bas seriktesi – SportyQory-ǵa erekshe alǵysyn bildiredi. Dál osy qoldaý komandalarǵa óz sporttyq maqsattaryna qol jetkizýge jáne álemdik regbıde Qazaqstannyń pozısıasyn nyǵaıtýǵa múmkindik berip otyr. Seriktestermen birlesken júıeli jumys turaqty ósýge jáne halyqaralyq arenalarda tabysty óner kórsetýge qolaıly jaǵdaı jasaıdy.