Almatyda ónerkásiptiń aýany lastaýyn azaıtatyn aýqymdy is-sharalar júzege asyrylyp jatyr: keler jyldyń sońyna deıin bitetin JEO-2 jańǵyrtý jumysy shyǵatyn zıandy zattardyń kólemin 13 ese qysqartýǵa múmkindik beredi. Óńirlik komýnıkasıalar qyzmetinde Ekologıa departamenti basshysynyń orynbasary Almat Álqoja osylaı dedi.
Almat Álqojanyń aıtýynsha, Almaty – halyq tyǵyz ornalasqan elimizdegi eń úlken qala, munda ónerkásip, ǵylym men mádenıet bir keńistikte toptasqan. Sondyqtan ekologıalyq aqparattyń ashyqtyǵy jáne memleket, bıznes pen qoǵam arasynda tıimdi yntymaqtastyq jasaý – ekologıalyq qaýipsizdik pen turaqty damýdyń negizgi sharty bolyp qala bermek.
Departamenttiń qorshaǵan ortany qorǵaý salasyndaǵy baqylaýdy kúsheıtip kele jatqanyn da atap ótti. İri tabıǵat paıdalanýshylar shyǵaryndylardy avtomatty túrde baqylaý júıelerin engizýge mindetti, bul júıe lastaıtyn zattar jónindegi derekterdi dál sol ýaqytta baqylaýǵa múmkindik beredi. Biraz kásiporyn ol júıege qosylyp úlgergen, áli de engizip jatqandary bar.
Mekeme tekserýge, ekologıalyq talaptyń saqtalýyn taldap, zıandy zattary azaıtyp, qaldyqtarmen jumys sapasyn jaqsartýǵa erekshe kóńil bóledi. Almatynyń ekologıalyq máselelerin keshendi sheshýge arnalǵan bekitilgen Jol kartasy JEO-2 nysanyn keler jyldyń sońyna deıin jańǵyrtpaq oıda. Bul – atmosferalyq júktemeni aıtarlyqtaı azaıtatyn negizgi sharýa.
Álqoja biraz kásiporynnyń ekologıaǵa jaýaptylyqty kúsheıtip, bastama kóterip jatqanyn aıtty: olar taza otynǵa kóship, qýattyń tıimdiligin arttyryp, ishki ekologıalyq standartyn jaqsartyp jatyr. Degenmen, eskirgen jabdyqty jańartý, júkteme kóp kezde zıannyń eselenýi, baqylaý derekterin ýaqtyly berý men ekologıalyq mádenıetti arttyrý qajettiligi sıaqty júıeli sheshimdi talap etetin máseleler áli de bar.
Brıfıń qorytyndysynda Álqoja ashyq dıalog pen birlesken sheshimder kásiporyndardyń qorshaǵan ortaǵa teris áserin tıimdi azaıtýǵa ári Almatynyń ekologıalyq saıasatyn nyǵaıtýǵa múmkindik beretinin atap ótti.