Almatyda 2025 jyly erekshe qajettílígí bar azamattarǵa arnalǵan mádenı bastamalardyń sany aıtarlyqtaı artty, dep habarlaıdy aqshamnews.kz
Būl turaly qalalyq Mádenıet basqarmasy málímdedí.
«Alatau» dástúrlí óner teatry janyndaǵy kóru jáne estu qabíletí būzylǵan azamattardyń mádenı demalysyn ūıymdastyru bólímí shyǵarmashylyq belsendílíktí qoldauǵa jáne qala tūrǵyndarynyń mádenı ómírge qatysuyn keńeıtuge baǵyttalǵan 132 ís-shara ótkízdí.
Bólím janynda bírneshe shyǵarmashylyq ūjym jūmysyn jalǵastyruda: «Atamūra» halyq aspaptar ansamblí, «Armandastar», «Án-júrek» jáne «Dos» vokaldy-aspapty ansamblderí. Jyl boıy olar «Aq qaıyń», «Sputnık», «Kóktem» shıpajaılarynda jáne Ūly Otan soǵysynyń ardagerleríne arnalǵan Respublıkalyq gospıtalde kontsertter qoıdy.
Zaǵıp jandarǵa arnalǵan mádenıet úıínde Qadír Myrzalıevtíń 90 jyldyǵyna, Mūqaǵalı Maqataevtyń tuǵan kúníne, Eskendír Hasanǵalıevtíń 85 jyldyǵyna jáne Nūrǵısa Tílendıevtíń 100 jyldyǵyna arnalǵan mereıtoılyq jáne aǵartushylyq ís-sharalar óttí. Sondaı-aq Arnūr Álímhanovty eske alu keshí ūıymdastyryldy.
22 qazanda kóru qabíletí būzylǵan duetter arasynda ótken «Ekí jūldyz» II halyqaralyq án festıvalí óttí. Oǵan Qazaqstan, Qyrǵyzstan jáne Ózbekstannan kelgen 10 duet qatysty.
Jyl boıy kontsertter, baıqaular, kınokórsetílímder, sheber sabaqtary ūıymdastyrylyp, túrlí úıírmeler men shyǵarmashylyq studıyalar jūmys ístedí. Korrektsıyalyq mektep oqushylaryn qalalyq, respublıkalyq jáne halyqaralyq baıqaularǵa daıyndau júrgízíldí. Sonymen qatar ym tílí jáne aǵylshyn tílí kurstary qoljetímdí boldy.
Mańyzdy oqıǵalardyń bírí – qala kúní men Jeńístíń 80 jyldyǵyna arnalǵan «Jeńís valsí» X respublıkalyq bı festıvalí boldy. Festıval elímízdíń toǵyz óńírínen kelgen bı ūjymdaryn bíríktíríp, Shákírtterdíń Innovatsıyalyq shyǵarmashylyq ortalyǵynda óttí.
Almatylyq qatysushylar halyqaralyq deńgeıde de tabysqa jettí. Mınsk qalasynda ótken estu qabíletí būzylǵan ardagerlerdíń óner festıvalínde Álím Meńdíbaev bas júlde ıelendí. Ózbekstandaǵy Azıya chempıonatynda N.A. Jukovskaya ekí bírínshí oryndy jeńíp aldy. Al doıby-64 boıynsha Álem kubogínde Á.J. Meńdíbaev rapıdte jeńímpaz atanyp, klassıkalyq baǵdarlamada úshínshí orynǵa ıe boldy.
Almatyda ınklyuzıvtí baǵdarlamalardy damytu jūmystary jalǵasuda. Basty maqsat – erekshe qajettílígí bar azamattardyń qalanyń mádenı ómíríne keńínen qatysu múmkíndígín arttyru.