Almatyda ónerkásiptik kásiporyndar ekologıalyq baqylaýdy kúsheıtip, osy zamanǵy standarttarǵa kóship, lastaıtyn zattardy azaıtý maqsatynda eń ozyq tehnologıalardy engizip jatyr. Bul týraly Almaty qalasynyń Óńirlik komýnıkasıalar qyzmetinde ótken baspasóz konferensıasynda habarlandy. "Hyundai Trans Kazakhstan" JSHS ekologıa bóliminiń bastyǵy Aızýra Aıtymova zaýyttyń ındýstrıalyq aımaqtaǵy ekologıalyq jaǵdaıdy jaqsartý úshin qandaı sheshimderdi qoldanyp jatqanyn aıtyp berdi.
Onyń aıtýynsha, kásiporyndaǵy barlyq óndiristik jumys tabıǵatty qorǵaý talaptaryna saı júzege asady. Lak-boıaý materıaldaryn jaǵý sehtarynda tolyqtaı germetıkalyq kameralar qoldanylyp, onda aýany tazartý gıdrojabyn (gıdrozavesa) prınsıpi boıynsha jasalady. Mundaı júıe bólshekter men shańdy 92 %-ǵa deıin ustap qalady: lastanǵan aýa týrbýlentti aǵynmen, sýmen aralasyp, bólshekter tunady da, sodan keıin tazartylǵan aýany shatyrdaǵy jeldetý júıesi arqyly syrtqa shyǵaryp otyrady.
Óndiriste qoldanylǵan sýdyń barlyǵy koagýlásıadan, pH deńgeıin retteýden bastap, súzý men shlamdy bólýge deıingi kópsatyly tazartýdan ótedi. Zaýytta birneshe jergilikti tazartý júıesi jumys isteıdi, onda sýdy tazartady, tekserip, qaıta aınalymǵa jiberedi nemese qaýipsiz túrde qalalyq kárizge baǵyttaıdy. Shlam men basqa da qaldyqtardy germetıkalyq ydystarda jınap, arnaýly uıymdarǵa kádege jaratýǵa beredi.
Shanaqty daıyndaý ýchaskelerinen, kataforezdik ґrýnttaý jelilerinen jáne óndiristiń basqa da kezeńderinen shyǵatyn aǵyndar alty deńgeıli tazartýdan ótedi. Qosymsha qoldanylatyn flotasıalyq qondyrǵy lastaýshy zattardy bólip, sýdy móldir etip shyǵarady. Tunba sýsyzdandyrylyp bólek shyǵarylyp, tazartylǵan aǵyndy qalalyq júıege jiberedi sosyn. Mundaı júıe qorshaǵan ortany tazarmaǵan qaldyq sýmen bylǵaýǵa jol bermeıdi.
Zaýytta qaldyqtar arnaýly kompanıamen birlesip suryptalady. "Sıfrlyq jasyl keńse" baǵdarlamasy iske qosylǵan. Keńselerdegi qoqys jáshikteri alynyp tastaldy, qyzmetkerler plasıkti arnaýly fandomattarǵa aparyp tapsyrady. Zaýyt aýmaǵyna osy zamanǵy sýarý júıesi ornatylǵan, eki myńnan astam bıik dińdi aǵash egilgen, bul ındýstrıalyq aımaqtyń mıkroklımatyn jaqsartýǵa septesedi. Tehnıkalyq qajettilik úshin aınalmaly sý júıesi men gradırnálar paıdalanylyp, jasyl-jelekti zaýyttyń uńǵymasynan alǵan sýmen ǵana sýaryp otyrady.
Aızýra Aıtymova júıeli ekologıalyq jańǵyrtý zaýytqa qorshaǵan ortaǵa túsetin júktemeni azaıtyp, Almatydaǵy barlyq iri óndiristik nysandarda birtindep engizilip jatqan Ekologıalyq kodekstiń jańa talaptaryna saı bolýǵa múmkindik berip otyrǵanyn atap ótti.