2025 jylǵy shilde qazaqstandyqtar úshin birneshe mańyzdy jańalyq pen ózgeriske toly bolmaq. Merekelik demalystan bastap, gaz baǵasynyń ósýi, jańa medısınalyq júıe men turǵyn úı erejeleriniń ózgerýine deıingi jańalyqtardy qysqasha sholyp ótemiz. Tolyǵyraq Aqshamnews.kz tilshisiniń materıalynda.
Úsh kún qatarynan demalys bolady
6 shilde – Astana kúni. Bıyl bul kún jeksenbige týra kelip turǵandyqtan, demalys 7 shildege (dúısenbige) aýysady. Osylaısha, el turǵyndary úsh kún qatarynan (6, 7 jáne 8 shilde) demalyp, merekeni keń kólemde atap óte alady.
sýret: depositphotos.com
Ne qymbattaıdy?
Shildeden bastap iri komersıalyq tutynýshylar men maınıngpen aınalysatyndarǵa arnalǵan gaz baǵasy ósedi. Eń qymbat baǵa Almaty, Almaty oblysy jáne Jetisý oblysynda tirkelgen – 76 686 teńge/myń tekshe metr. Al eń tómengi baǵa – Shyǵys Qazaqstanda, munda gazdyń myń tekshe metri 13 069 teńge bolady.
Sondaı-aq, un men maıdyń jáne alkogóldiń de baǵasy kóteriledi. Bul týraly QR Saýda jáne ıntegrasıa mınıstrligi habarlady.
Un 44,6%-ǵa (eń tómengi baǵa kılogrammyna 96,65 teńgeden 139,81 teńgege deıin), kúnbaǵys maıy 61,2%-ǵa qymbattaıdy. Ashytqy da qymbattaıdy. Bul ıngredıentterdiń mańyzdylyǵyn eskersek, kóp taǵamdy daıyndaý quny da artady. Nan, kondıterlik ónimder men un ónimderi de qymbattaýy múmkin.
Alkogólge keletin bolsaq: araq 6,4%-ǵa, lıtri 1136,16 teńgege deıin, al konák 21,5%-ǵa, lıtri 3282,97 teńgege deıin qymbattaıdy.
sýret: depositphotos.com
Medısınalyq kómekti tóleýdiń jańa júıesi engiziledi
1 shildeden bastap elimizdiń barlyq óńirinde Medısınalyq kómekti tóleýdiń biryńǵaı júıesi engiziledi. Bul júıe medısınalyq qyzmetterdi qarjylandyrýda ádilettilikti qamtamasyz etýdi, jemqorlyqty boldyrmaýdy jáne sapaly em alýǵa múmkindik berýdi kózdeıdi. Pılottyq joba 1 naýryzda Aqmola oblysynda bastalǵan.
sýret: depositphotos.com
Elektron qujattardy sotqa tapsyrý tártibi ózgeredi
Sot isterine qatysty qujattardy elektron túrde jiberý erejesine ózgeris engizildi. 1 shildeden bastap qujat kólemi 20 MB-qa deıin ulǵaıtylady (buryn 10 MB edi), qujattar *doc, *docx, *pdf, *xlsx formattarynda qabyldanady. Qate adresatqa joldanǵan, oqýǵa kelmeıtin nemese qoltańbasy durys emes faıldar qabyldanbaıdy.
sýret: depositphotos.com
Turǵyn úı tólemderine qatysty jańa ereje
Jańa ózgeristerge sáıkes, shildeniń 1-inen keıin qyzmetke kirgen prokýratýra, ekonomıkalyq tergeý jáne azamattyq qorǵaý salasy qyzmetkerleri de turǵyn úı tólemin alýǵa múmkindik alady. Qyzmet ótili 20 jyldan asqan mamandarǵa memlekettik turǵyn úıdi jekeshelendirýge ruqsat beriledi. Sonymen qatar, tólem esebinen alynatyn turǵyn úı kólemi 90 sharshy metrmen shekteledi.
sýret: depositphotos.com
Reseıge kirý tártibi kúrdelene túsedi
30 maýsymnan bastap Reseıge kirý úshin elektron ótinishti saparǵa keminde 72 saǵat buryn toltyrý mindetteledi. Tek shuǵyl jaǵdaılarda (jaqynynyń ólimi, shuǵyl emdelý) 4 saǵat buryn habarlaýǵa ruqsat etiledi. Sonymen qatar, barlyq ótkizý beketinde saýsaq izin tapsyryp, fotosýretke túsý talap etiledi.
sýret: depositphotos.com
Jańa áýe reısteri ashylady
– 2 shildeden bastap Petropavldan Egıpettiń Sharm-el-SHeıh qalasyna tikeleı reıster ashylady.
– Shymkentten Qytaıdyń eki qalasyna jańa reıster qosylady:
• Sıan – ár sársenbi jáne senbi kúni
• Úrimji – ár seısenbi jáne juma kúni
sýret: depositphotos.com
Almatyda balabaqshalardy vaýcherlik qarjylandyrý júıesi iske qosylady
1 shildeden bastap Almaty qalasynda balabaqshalardy vaýcherlik qarjylandyrý júıesi engiziledi. Oqý-aǵartý mınıstrliginiń 2024 jylǵy 30 jeltoqsandaǵy buıryǵyna sáıkes, bul júıe mektepke deıingi bilimniń qoljetimdiligin arttyrý, sapasyn jaqsartý jáne ata-analarǵa balabaqsha tańdaý erkindigin berý maqsatynda iske asyrylmaq.
Baǵdarlamaǵa Almatydaǵy 988 balabaqsha qatysady, onyń ishinde 196 memlekettik jáne 792 jekemenshik balabaqsha bar. Ata-analar balabaqshany bos orynǵa qaraı tańdaı alady. Vaýcher arqyly ata-analar balabaqshaǵa aqy tólep, memlekettik nemese jekemenshik mekemelerden qyzmet ala alady.
Vaýcherdi alý úshin ata-analar elektron portal arqyly ótinish berip, balabaqshaǵa barǵany týraly rastaýdy usynǵannan keıin qarjylandyrý alady. Bul júıe mektepke deıingi bilimdi barlyq áleýmettik toptarǵa qoljetimdi etýge jáne qyzmet kórsetý sapasyn arttyrýǵa baǵyttalǵan.
sýret: depositphotos.com
Jańa aıyppul túri kúshine enedi
5 shildeden bastap Qazaqstanda kóshede jáne aýlada ósken aǵashtardy zańsyz kesýge tyıym salynady. Ekologıa jáne tabıǵı resýrstar mınıstriniń buıryǵyna sáıkes, sırek jáne joıylyp bara jatqan aǵash túrlerin, sondaı-aq qarapaıym ósimdikterdi kesý úshin aıyppuldar belgilendi. Mysaly, qaraǵaı men shyrsha úshin aıyppul 15-45 AEK (58 980 teńgeden 176 940 teńgege deıin), al grek jańǵaǵy aǵashy úshin 50-80 AEK (196 600 teńgeden 314 560 teńgege deıin) mólsherinde bolady.
sýret: depositphotos.com