Qazaqstanda balanyń ultyn aıqyndaýdyń jańa tártibi engiziledi, dep habarlaıdy aqshamnews.kz
Konstıtýsıalyq sot balanyń ultyn aıqyndaýdyń jańa tártibin engizgeli jatqanymen, árkim óz ultyn tańdaıtyndaı múmkindik berilmeıtinin atap ótedi.
Konstıtýsıalyq sot tóraǵasy Elvıra Ázimovanyń aıtýynsha, Parlament depýtattary bastamashy bolǵan birneshe zań jobasyna Konstıtýsıalyq sottyń quqyqtyq ustanymdary men qorytyndylaryna baılanysty zańnamalyq usynystar toptamasy engizilgen.
Zańnamalyq kún tártibinde mynadaı máselelerdi qaraýdy usynamyz: qylmystyq-prosestik kodekske, «Neke (erli-zaıyptylyq) jáne otbasy týraly» kodekske jáne onymen baılanysty ózge de zań aktilerine quqyqtyq ustanymdardy eskere otyryp ózgerister engizý usynysy bar. Ózgerister alqabılerdi sot prosesin kezinde aýystyrý tártibine, balanyń ultyn anyqtaý jáne atap kórsetýge, balany asyrap alý ınstıtýtyn jetildirýge, alıment tóleý mindettemelerin oryndaýǵa qatysty, – dedi Ázimova Parlament palatalarynyń birlesken otyrysynda.
Balanyń ultyn anyqtaý máselesinde kez kelgen ultty erkin tańdaý quqyǵy berilmeıdi. Alaıda ulty tek ata-anasynyń ultyna qarap qana emes, basqa jaǵdaılar boıynsha da kórsetilýi múmkin bolady. Máselen, bala jetim bolsa nemese ata-anasynyń qujattary joǵalǵan jaǵdaılar eskeriledi. Qoldanystaǵy zańda mundaı jaıttar eskerilmegen.
Buǵan deıin Qazaqstanda balanyń ultyn ata-anasyna qaramaı aıqyndaýǵa ruqsat etilgeli jatqany habarlanǵan edi. Konstıtýsıalyq sot kámeletke tolmaǵan balanyń ata-anasy týraly eshqandaı málimet bolmasa, onyń ultyn aıqyndaýǵa ruqsat beretinin sottyń baspasóz qyzmeti habarlaǵan.
Jýyrda Konstıtýsıalyq sotqa qamqorlyǵyndaǵy balanyń ultyn resmı túrde kórsetkisi kelgen azamat júgingen. Balanyń ata-anasy týraly eshqandaı málimet bolmaǵandyqtan, AHAT balanyń qujattaryna ultyn jazýdan bas tartqan. Sottar da Neke jáne otbasy týraly kodekstiń 65-babyna silteme jasaı otyryp, eger ata-anasynyń ulty aıqyndalmasa, balanyń ultyn anyqtaý múmkin emes degen sheshim shyǵarǵan. Konstıtýsıalyq sot norma mundaı jaǵdaılardy qarastyrmaıtynyn jáne ózin-ózi sáıkestendirý quqyǵyn buzatynyn moıyndaǵan edi.