Bir oıynshynyń ortasha qaryzy 10 mln teńge shamasynda.
Senat depýtaty Dana Nurjigitova býkmekerlik kompanıalardyń jarnamasyna tyıym salý kerektigin aıtty, dep habarlaıdy Almaty-akshamy.kz
Depýtattyń aıtýynsha, ózine shaǵymdanǵan azamattar býkmekerlik keńselerdi jarnamalaýǵa qatysty zańnamalyq sharalar qabyldaýdy talap etedi.
«Jarnama týraly» qoldanystaǵy zańǵa sáıkes, kazıno men ınternet-kazıno qyzmetterin jarnamalaýǵa tyıym salynady. Biraq býkmekerlik keńselerdiń qyzmetterin jarnamalaýǵa tikeleı tyıym joq. Sondyqtan mundaı kompanıalardyń jarnamalary ınternette agressıvti túrde alǵa jyljyp barady. Osy faktini eskere otyryp, býkmekerlik kompanıalardy jarnamalaýǵa tolyq tyıym salý boıynsha qoldanystaǵy zańnamaǵa tıisti ózgerister engizý qajet», - dedi Dana Nurjigitova.
Senatordyń málimetinshe, Qazaqstanda qumar oıynshylardyń sany 350 myńnan asady, al bir oıynshynyń ortasha qaryzy 10 mln teńge shamasynda.
«Jasy 18-ge tolǵan kez kelgen azamatqa, tabysyna qaramastan, mobıldi qosymshalarmen nesıe beriledi. Mundaı qoljetimdi nesıeler qumar oıyndardyń tólemderine de jumsalady. Bank aldynda bereshegi bar, qumar oıynnyń jeteginde júrgen 18-27 jas aralyǵyndaǵy azamattar áskerge barady. Bul kezde nesıeniń paıyzy óse beredi», - deıdi senator.