QR Parlamenti Májilisiniń depýtaty Aıdos Sarym «Jańa Qazaqstan» depýtattyq tobynyń basty maqsatyn atady, dep habarlaıdy Almaty-akshamy.kz
«Jańa Qazaqstan» depýtattyq tobynyń qurylýy sebebi, onyń sharty týraly aıtýǵa ruqsat etińizder. Ózderińiz bilesizder, keshe Májilistiń jalpy otyrysynda áriptesimiz Edil Jańbyrshın málimdememizdi jarıalaǵan bolatyn. Qazir ol kisi Úkimette Jańaózen máselesi boıynsha kelissóz júrgizip jatyr. Bizdiń basty maqsatymyz - qańtar tragedıasynan keıingi elimizdegi shynaıy reformalardy qoldaý. Birinshiden, Prezıdent bastaǵan eldi jańǵyrtatyn bastamalardy qoldap, olardy sabatajǵa, toqtaýǵa, sońyna ysyrýǵa jol bermeý. Ekinshiden, kez kelgen úlken saıası reformalar zań shyǵarýshy jáne ókiletti organnan bastalýy kerek. Bizdiń túpkilikti maqsatymyz - Májilistiń jumysyn jańa jolǵa, jańa arnaǵa burý. Onyń ishinde Májilistiń ashyqtyǵy, belsendi áńgime kóterip, ony qozǵaý da bar. Bul - úlken máseleniń biri», - dedi ol elordada uıymdastyrǵan baspasóz máslıhaty barysynda.
Sonymen qatar ol «Jańa Qazaqstan» depýtattyq toby Májilistiń reglamentin, Májilis týraly, Májilis depýtattary týraly zańnamany ózgertýge kúsh salatyndyǵyn basa aıtty.
«Bul - ózimizdiń qolymyzda turǵan nárse. Elimizde júrgizip jatqan búdjettik baǵdarlamalarynyń tıimdiligin arttyrý maqsatynda Úkimetpen jáne basqa da memlekettik organdarmen qoıan-qoltyq jumys istep, talaptardy kúsheıtemiz. Jaqynda Prezıdent naýryz aıynda úlken saıası reformalardyń jarıalanatyndyǵyn aıtty. Soǵan belsene atsalysamyz. Eldegi reformalardyń durys júrgizilýin, onyń shyn máninde qoǵamnyń, halyqtyń talabynan shyǵýyn nazarda ustap, onyń belsendi sýbektisine aınalamyz. Úshinshiden, aımaqtaǵy ókiletti organdardyń jumysyn jandandyrý qajet. Qoǵamdyq keńesterge, máslıhattarǵa ózgerister kerek. Olarǵa jaqsy úlgi kórsetý kerek dep oılaımyz. Osy turǵyda da eńbek etemiz», - dedi Aıdos Sarym.