Mundaı tásil Ulybrıtanıa, Norvegıa sıaqty elderde qoldanylady.
QR Bas prokýrorynyń orynbasary Erlik Kenenbaev tergeý hattamalaryn beınejazbamen bekitý tásilin engizýdi usyndy, dep habarlaıdy Almaty-akshamy.kz
«Biz damyǵan elderdiń halyqaralyq tájirıbesin muqıat zerttep jatyrmyz. Eýropa elderinde polısıanyń ustalǵandarmen qarym-qatynasyn retteıtin arnaıy standarty bar. Saqshylar sol standartty saqtaı otyryp jumys isteıdi. Ol standarttar boıynsha polısıa ókiliniń árbir qadamy ret-retimen kórsetilgen. Iaǵnı, bir qadamdy istemeı turyp, ekinshi qadamyn jasaı almaıdy. Mundaı tásil Ulybrıtanıa, Norvegıa sıaqty elderde qoldanylady», - dedi Bas prokýratýra ókili.
Aıtýynsha, atalǵan tásilderdi Qazaqstanǵa da engizý kerek.
«Tergeý týraly aıtsaq, ol beınekameramen jabdyqtalǵan arnaıy kabınette qorǵaýshynyń qatysýymen ótýi kerek. Qylmystyq prosesterdiń ashyqtyǵy úshin tergeý áreketteriniń beınehattamasyn engizýdi bekitý oryndy bolady. Beınehattama tergeý sharasynyń qorytyndysy men barysyn burmalaýǵa jol bermeıdi. Sondaı-aq, tergeýshilerdiń quzyryn asyra paıdalanýyna jol bermeıdi. Tehnologıalardy keńinen qoldaný quqyq qorǵaý organdarynyń jumysyndaǵy qara daqtardy jaryqqa shyǵarady dep topshylaımyn», - dedi Erlik Kenenbaev.