Memleket basshysynyń tapsyrmasyna sáıkes bıyl Qazaqstanda qarjy zańnamasyn reformalaýdyń úlken paketi daıyndalyp jatyr. Bul týraly QR Ulttyq Bankiniń Tóraǵasy Tımýr Súleımenov Úkimet otyrysynda málimdedi, - dep habarlaıdy Aqshamnews.kz.
Ol Ulttyq Bank makroekonomıkalyq jáne qarjylyq turaqtylyqty qamtamasyz etý boıynsha jumystardy jalǵastyra beretinin atap ótti.
Inflásıanyń ósý táýekelin azaıtý úshin respýblıkada dezınflásıalyq saıasat júrgizilmek. Aqsha-kredıt saıasaty quraldarynan bólek qosymsha sharalar qabyldanady.
- Altyn satyp alý sheńberinde valútalyq operasıalardy teńdestirý jalǵaspaq.
- Jeke tulǵalardyń nesıeleri boıynsha kontrsıkldik kapıtal býferin engizý týraly sheshim qabyldandy.
- Bankter úshin mindetti rezervterdiń eń tómengi talaptaryn arttyrý jumysy pysyqtalyp jatyr.
- Aktıvterdi basqarý aıasynda Ulttyq qor men Biryńǵaı jınaqtaýshy zeınetaqy qorynyń portfelinde joǵary kiristilikke ıe aktıvterdiń úlesin ulǵaıtý kózdelip otyr.
- Qarjy sektorynyń sıfrlyq transformasıasy jalǵasady. Sıfrlyq teńgeni masshtabtaý jumystary júrgiziledi. Bul sıfrlyq teńgeni memlekettik qarjynyń jańa baǵyttarynda engizý múmkindikterin pysyqtaýdy qamtıtyn bolady.
- Bıyl Memleket basshysynyń tapsyrmasyna sáıkes elimizdiń qarjy zańnamasy boıynsha aýqymdy reformalar toptamasy ázirlenip jatyr. Bul toptamada bankter, tólemder, baǵaly qaǵazdar naryǵyn damytý jáne basqa da máseleler qamtylǵan. Oǵan qosa Sıfrlyq qarjy aktıvterin retteýdi jáne Ulttyq sıfrlyq qarjy ınfraqurylymyn engizý josparlanýda. Tólem naryǵyn odan ári damytýdy jalǵastyramyz. Atalǵan sharalar qarjy sektorynyń ekonomıkany damytýǵa jáne azamattardyń ál-aýqatyn jaqsartýǵa qosyp jatqan úlesin arttyrady, onyń dástúrli sektorlaryna da, jańa salalarǵa da serpin beredi.