Búgin, 12 mamyr – álemniń 141 elinde atap ótiletin Halyqaralyq meıirgerler kúni. Bul kún – medısına salasyndaǵy orta býyn qyzmetkerleriniń mańyzyn tanytatyn kásibı mereke. Bul dataǵa qatysty qandaı qyzyqty derekter bar? Aqshamnews.kz tilshisi tarqatady.
Sandar sóılesin
Elimizde 190 000-nan astam orta býyn medısına qyzmetkeri bar. Onyń ishinde 146 000-nan astamy – meıirgerler. Aýyldyq jerlerde 55 000 meıirger jumys isteıdi. Bul týraly Densaýlyq saqtaý mınıstrliginiń baspasóz qyzmeti málimdedi.
"Meıirgerlerdiń róli artyp keledi"
Qyzmet aıasyn keńeıtý nátıjesinde qazir meıirgerlik qyzmet komandalyq medısınalyq kómektiń negizgi bóligine aınaldy. Keńeıtilgen praktıka meıirgerleri naýqastardy bastapqy qabyldap, qujat júrgizip, resept jazyp, suryptaý men tirkeý jumystaryn oryndaıdy. Sozylmaly aýrýlardy basqarý, vaksınasıa, skrınıng, profılaktıkamen de aınalysady.
Sondaı-aq, elimizde meıirgerlerdi daıyndaıtyn oqý oryndarynyń sany da ulǵaıyp keledi.
"Qazaqstanda meıirgerlerdi 94 medısınalyq kolej daıarlaıdy, onyń ishinde 22-si – memlekettik, 72-si – jekemenshik. Olardyń 39-y – joǵary medısınalyq kolej mártebesine ıe. Jyl saıyn elimizde 23 000-nan astam jalpy beıindi maman daıarlanady, al sońǵy alty jyldyń ishinde qoldanbaly bakalavrıat dıplomy bar 20 000-nan astam meıirger densaýlyq saqtaý mekemelerine jumysqa ornalastyryldy" delingen habarlamada.
Aıta keteıik, Halyqaralyq meıirgerler kúni ár jyly 12 mamyrda atap ótiledi. Bul kúnniń tańdalýy Florens Naıtıngeıldiń týǵan kúnimen (1820 jylǵy 12 mamyr) baılanysty. Ol zamanaýı meıirgerlik istiń negizin qalaýshy bolyp sanalady. Bul kásibı mereke 1965 jyldan bastap resmı túrde atap ótile bastady, al ony alǵash ret uıymdastyrǵan — Halyqaralyq meıirgerler keńesi (ICN – International Council of Nurses).