«Shymbulaq» taý kýrortynda alǵash ret EcoDay ekofestıvali ótti.
Bir kúndik sharanyń maqsaty – turaqty ómir saltyn nasıhattap, qonaqtarǵa tabıǵatty qorǵaýdyń mańyzyn is júzinde kórsetý.
Festıvál «Shymbulaq» kýrorty, Recycle Birge ekologıalyq qozǵalysy jáne HelloEco – Qazaqstandaǵy alǵashqy zero waste dúkeni birigip uıymdastyrdy. Olar ekologıany tek teorıa emes, naqty ári qoljetimdi áreket retinde kórsetýge tyrysty.
Tájirıbe arqyly úırený
EcoDay aıasynda kelýshilerge:
• qaǵaz ben plasıkti qaıta óńdeý,
• tabıǵı spreı jasaý,
• plasıksiz kútim quraldaryn paıdalaný boıynsha sheberlik sabaqtary usynyldy.
Sondaı-aq arnaıy aımaqtarda:
• Leave No Trace qaǵıdalarymen (tabıǵatqa zıan keltirmeı demalý),
• apsaıklıngpen (eski zattardy jańa paıdaly buıymǵa aınaldyrý) tanysty.
Qonaqtar tapsyrmalardy oryndap, eko-syılyqtar utyp aldy. Bul olardyń kúndelikti ádetterine jańa kózqaraspen qaraýyna túrtki boldy.
Shymbulak Outdoor uıymy basshysynyń orynbasary Mahambet Abdýllaev EcoDay-dyń turaqty túrde ótetinin aıtyp, bul bastama kýrorttyń ekologıalyq damý baǵytyna tolyq sáıkes keletinin atap ótti.
Ekologıa – bul ómirdi jeńildetý
HelloEco dúkeniniń teń quryltaıshysy Dına Ogaı festıváldegi sózinde ekologıanyń sanaly tańdaý ekenin jetkizdi:
«Ekologıalyq ómir súrý – bul kóp rettik zattardy qoldaný, oılanyp áreket etý. Tabıǵatty qorǵaý úshin ómir saltyńdy túbegeıli ózgertýdiń qajeti joq. Zamanaýı ómirmen qatar tabıǵatty da qorǵaýǵa bolady».
Aıta keteıik, HelloEco dúkeni Almatynyń Samal yqshamaýdanynda ornalasqan. Munda azyq-túlik, kosmetıka, turmystyq hımıa jáne gıgıena quraldaryn plasıksiz satyp alýǵa bolady.
Ekologıalyq bilim – mádenıettiń irgetasy
Festıváldiń negizgi seriktesteriniń biri – Recycle Birge uıymy. Onyń teń quryltaıshysy, ekolog Pakızat Saılaýbekova halyqtyń ekologıalyq saýatyn arttyrý basty maqsat ekenin aıtty:
«Qaıta óńdeý, bir rettik zattardan bas tartý qıyn emes. EcoDay aıasynda biz qaldyqtardy durys basqarý týraly paıdaly aqparatpen bólistik. «Shymbulaqtyń» bastamasyn qoldaımyz jáne bolashaqta da birge jumys isteýge daıynbyz».
Sondaı-aq Saılaýbekova ár adamnyń tabıǵat aıasyna shyqqan kezde ózinen keıin qoqys tastap ketetinin eske saldy.
«Qoqysty jınaý, ósimdikterdi julmaý sıaqty qarapaıym áreketterdiń ózi – úlken mańyzǵa ıe. EcoDay sıaqty sharalar bul oıdy túsinikti ári shynaıy jetkizýge kómektesedi», – dedi ol.