Maýsymnyń úshinshi jeksenbisi – Qazaqstanda Ákeler kúni retinde atalyp ótedi. Bul ataýly kún alǵash ret 2023 jyly resmı bekitildi. Merekeni belgileýge Aqparat jáne qoǵamdyq damý mınıstrligi bastamashy bolyp, bul - elimizdegi otbasy ınstıtýtyn nyǵaıtýǵa yqpal etedi dep sendirdi. Osy data qarsańynda Aqshamnews.kz tilshisi eldegi jalǵyzbasty jáne dekrettegi ákeler jaıly qyzyqty derekterdi usynady.
Qazaqstanda 52 myń jalǵyzbasty áke bar
2022 jylǵy halyq sanaǵynyń qorytyndysy boıynsha, Qazaqstanda 18 jasqa deıingi balasy bar 476 myń jalǵyzbasty ata-ana tirkelgen. Olardyń 52 myńy – er azamattar. Iaǵnı bul – bala tárbıesin jalǵyz óz moınyna alǵan 52 myń áke. Arasynda jesirler de, ajyrasqandar da, tipti múlde úılenbegender de bar. Ókinishke qaraı, Ulttyq statısıka búrosy 2022 jylǵy qolda bar keıingi derekterdi ǵana usyndy.
Elimizde bir emes, tórt ret dekretke shyqqan ákeler bar
2025 jyldyń alǵashqy 4 aıynda elimizde 863 áke resmı túrde dekrettik járdemaqy alǵan. Byltyr - 477, al 2023 jyly 583 áke bala kútimine baılanysty áleýmettik demalysqa shyqqan.
Dekretke shyqqan ákelerdiń 65 paıyzy 30 ben 40 jas aralyǵyndaǵy azamattar. Olar negizinen saýda, avtokólik jóndeý, ǵylymı jáne tehnıkalyq qyzmet, óńdeý ónerkásibi, qurylys, memlekettik basqarý men qorǵanys salalarynda eńbek etedi. Iaǵnı, bala tárbıesi úshin ýaqytsha eńbek úzilisin kóbine kásibı ortada ornyqqan, jumys tájirıbesi bar azamattar alady.
Memlekettik áleýmettik saqtandyrý qorynyń málimetinshe, bala kútimine baılanysty áleýmettik tólem alyp otyrǵan er azamattardyń 636-sy bul tólemdi alǵash ret alyp otyr. 110 adam ekinshi ret, 21 azamat úshinshi ret, al 2 kópbalaly áke tórtinshi nemese odan da kóp ret dekretke shyqqan.
Geografıalyq turǵyda qaraǵanda, dekrettik demalystaǵy ákelerdiń eń kóp úlesi Almaty (112 adam), Astana (106 adam) jáne Jambyl oblysynda (104 adam) tirkelgen. Al Ulytaý, Batys Qazaqstan, Abaı, Qyzylorda jáne Jetisý oblystarynda bala kútimine baılanysty demalys alatyn er azamattar sany áldeqaıda az.
Tul qalǵan er adamdar – 130 myńnan asady
2021 jylǵy málimetke saı, elimizde 130 myń tul er adam bar. Bul – ómirlik seriginen aıyrylǵan, biraq kóp jaǵdaıda áke rólin jalǵyz arqalap júrgen azamattar. Al jesir qalǵan áıelderdiń sany - 600 myńǵa jýyqtaıdy. Bul kórsetkish erlerden 5 ese kóp.