Maýsymnyń úshinshi jeksenbisi - medısına qyzmetkerleri kúni. Kásibı mereke qarsańynda Aqshamnews.kz tilshisi elimizdegi densaýlyq saqtaý salasyna qatysty jurt bilmeıtin derekterdi usynady.
Qazaqstanda qansha medqyzmetker bar?
2025 jyldyń 1 qańtaryndaǵy málimetke sáıkes, Qazaqstanda 275 107 medısına qyzmetkeri tirkelgen. Onyń ishinde 83 379 – dáriger, 191 728 – orta medısına qyzmetkeri (meıirger, feldsher t.b.). Densaýlyq saqtaý mınıstrliginiń málimetinshe, bulardyń arasynda eń kóp júktememen jumys isteıtin dárigerlik mamandyqtar jalpy praktıka dárigerleri jáne terapevter eken.
Medısına mamandyqtaryna suranys qandaı?
Sońǵy bes jylda medısınaǵa qyzyǵýshylyq artqany baıqalady. 1-kýrsqa qabyldanǵan stýdentter sany:
-
2020–2021 oqý jyly – 8 351
-
2021–2022 – 10 846
-
2022–2023 – 12 844
-
2023–2024 – 16 396
-
2024–2025 – 17 490
Qazirgi tańda elimizde 71 754 stýdent bolashaq dáriger retinde bilim alyp jatyr. Alaıda 2024 jyldyń qorytyndysy boıynsha medısına mamandarynyń tapshylyǵy 8217,25 sht.birlik qurady (onyń ishinde dárigerler – 3986, OMQ – 4231,25). Eń úlken tapshylyq kelesi jalpy praktıka dárigerleri (255,25), terapevtter (252,75), anestezıologtar-reanımatologtar (230,25), akýsher-gınekologtar (183,75), hırýrgtar (164,5), pedıatrlar (150), dáriger-zerthanashylar (101,5) boıynsha baıqalǵan.
Eń kóp jáne eń az jalaqy alatyn medqyzmetkerler
Medısına salasynyń qyzmetkerleri arasynda eń joǵary jáne eń az jalaqy alatyndar kimder ekenin suratqan bolatynbyz. Alaıda vedomstvo bul suraqqa naqty sandarmen jaýap bermedi. Sebebi, dáriger jalaqysyn taǵaıyndaý júıesi kúrdeli. Ol:
-
dárigerdiń biliktiligine,
-
isteıtin jumys kólemi men kúrdeliligine,
-
menshik nysanyna,
-
jáne eńbek shartyna baılanysty belgilenedi.
Memlekettik mekemelerdegi eńbekaqy QR Úkimetiniń qaýlysyna saı bekitiledi. Al sharýashylyq júrgizý quqyǵyndaǵy mekemelerde jalaqyny mekemeniń ózi belgileıdi. Sondyqtan bir salanyń eki túrli mekemesinde jumys isteıtin mamandardyń aılyǵy aıtarlyqtaı aıyrmashylyq kórsetýi múmkin.
Kásibı qateligi úshin qansha dáriger isti boldy?
Sońǵy úsh jylda medısınalyq qatelikke baılanysty 2022 jyly – 6, 2023 jyly – 5, 2024 jyly – 10 is qaralǵan. Bul isterdiń barlyǵy tártiptik, sottyq nemese ákimshilik jaýapkershilikke tartý boıynsha qaralǵan.