Shanhaı Yntymaqtastyq Uıymy Turaqty damý jyly jáne BUU uıymdastyrǵan Dúnıejúzilik shyǵarmashylyq jáne ınovasıalyq qyzmet kúni aıasynda Qytaıdyń Sındao qalasynda SHYU-ǵa múshe elderdiń IV Jastar ınovasıalar jáne kásipkerlik baıqaýy ótti. İs-sharada óńirdiń ǵylymı jáne startap-ortasynyń úzdik ókilderi bas qosyp, ol jahandyq syn-qaterlerdi sheshýge baǵyttalǵan naǵyz ozyq ıdeıalar sóresine aınaldy.
Baıqaýdyń maqsaty – jas kásipkerlerdi ilgeriletý ǵana emes, ınovasıalyq yntymaqtastyqtyń memleketaralyq ekojúıesin qalyptastyrý, onyń basty mejesi - turaqty damý, sıfrlandyrý jáne ekologıalyq sheshimder. Qazaqstannyń qarymdy ókildigi forýmnyń jarqyn aksentine aınaldy. Halyqaralyq jasyl tehnologıalar jáne ınvestısıalyq jobalar ortalyǵynyń (HJTIJO) bazasynda GCIP-Kazakhstan akselerasıalyq baǵdarlamasynan ótken úsh startap fınalısterdiń qataryna ilikti jáne qazylar alqasynyń nagradalarymen marapattaldy.
- Úshinshi oryndy «Ózin-ózi aqtaıtyn dekarbonızasıa jáne sarqyndy sýlardy tazartý tehnologıasy» – ónerkásiptik ekologıa salasyndaǵy praktıkalyq sheshim ázirlemesimen Science and Technology Water Center jobasy ıelendi.
- Smart Energy Solutions energetıkalyq júıelerdi sıfrlandyrýǵa baǵyttalǵan AMI Data Analytics ınovasıalyq platformasy úshin úzdik jetistikteri úshin syılyq aldy.
- Elektrondyq qaldyqtardan asa mańyzdy materıaldardy qalpyna keltirýmen aınalysatyn Kaz-REEcycling jobasy sıkldik ekonomıkaǵa perspektıvaly tásildi usyna otyryp, fınalıst boldy.
GCIP-Kazakhstan men HJTIJO: jahandyq aýqymdaǵy jergilikti damý.
Qazaqstandyq jobalardyń osyndaı bedeldi halyqaralyq baıqaýǵa qatysýy otandyq cleantech-sektordyń jetilgendigi men órshildigin kórsetedi. Jahandyq áriptesterdiń qoldaýymen HJTIJO júzege asyryp jatqan GCIP-Kazakhstan baǵdarlamasy bir mezgilde ekonomıkalyq ósýge, ekologıalyq turaqtylyq pen tehnologıalyq jańǵyrtýǵa yqpal etetin sheshimderdi qoldaý, masshtabtaý jáne naryqqa shyǵarý sıaqty óziniń negizgi mısıasyn oryndap jatyr.
Qabyldaýshy taraptyń atynan qatysýshylardy Sındao Halyq jınalysynyń Turaqty komıteti tóraǵasynyń orynbasary Han Shoýsın jáne QHR Ǵylym jáne tehnologıa mınıstrliginiń ókilderi qarsy aldy. SHYU Hatshylyǵynyń keńesshisi Qaırat Baıtasov baıqaýdaǵy árbir joba – jaı ǵana bıznes-ıdeıa emes, XXI ǵasyrdyń syn-qaterlerine: jasandy ıntellektiden bastap turaqty energetıkaǵa deıingi naqty jaýap ekenin erekshe atap ótti.
HJTIJO KEAQ basqarma tóraǵasynyń mindetin atqarýshy Sáken Qalqamanovtyń aıtýynsha, «Qazaqstan SHYU aımaǵynyń ortaq ǵylymı-ınnovasıalyq keńistigin qalyptastyrýdaǵy mańyzdy rólin rastap otyr. Búginde el tek tehnologıalyq sheshimderdi tutynýshy ǵana emes, sonymen qatar ekologıalyq maǵyna men qundylyqtardy eksporttaýshy retinde ekonomıkany ıntellekt, kásipkerlik jáne áriptestik arqyly túrlendirip keledi».
Anyqtama:
Global Cleantech Innovation Programme (GCIP)-Kazakhstan –taza tehnologıalar salasyndaǵy jahandyq ınovasıalyq baǵdarlama – Dúnıejúzilik ekologıalyq qor (DEQ) men Birikken Ulttar Uıymynyń Ónerkásiptik damý uıymynyń (IýNIDO) negizgi flagmandyq bastamalarynyń biri bolyp tabylady. Baǵdarlama ekologıalyq taza tehnologıalar salasyndaǵy ınovasıalar men kásipkerlikti damytýǵa baǵyttalǵan. GCIP baǵdarlamasy perspektıvaly startaptardy anyqtaý, olardy qoldaý, damytý, komersıalandyrý jáne naryqqa shyǵarý boıynsha praktıkalyq quraldardy usynady. Sondaı-aq, baǵdarlama Qazaqstanda tómen kómirtekti jáne resýrsty únemdeıtin damý baǵytyn ilgeriletý maqsatynda halyqaralyq úzdik tájirıbelerdi engizýdi kózdeıdi.