Demografıa – óńirdiń áleýmettik-ekonomıkalyq jaǵdaıynyń aınasy.
2025 jyldyń alǵashqy toqsanynda elimizde 106 111 bala týylyp, 42 628 adam qaıtys bolǵan. Osylaısha, Qazaqstandaǵy tabıǵı ósim 63 myńnan astam adamdy qurady, dep habarlaıdy aqshamnews.kz.
"NK" dereginshe, Ulttyq statısıka búrosynyń málimetteri boıynsha, sońǵy bir jyl ishinde Qostanaı oblysynda ólim-jitim kórsetkishi ár 1000 adamǵa shaqqanda 10,10 bolǵan. Bul respýblıka boıynsha eń joǵary kórsetkishterdiń biri. Alǵashqy qatarda Soltústik Qazaqstan oblysy (11,51) men Shyǵys Qazaqstan oblysy (11,25) tur.
Joǵary ólim-jitimniń basty sebebi – halyqtyń jastyq qurylymynda. Iaǵnı, egde jastaǵy adamdar úlesi kóp.
Qostanaı oblysynyń halqy – 824 624 adam, bul Qazaqstan halqynyń shamamen 4,1%-y. Oblystaǵy qalalyq halyqtyń úlesi 63%-dan asyp, bul respýblıkalyq ortasha kórsetkishten (56%) joǵary. Bul aımaqta ýrbanızasıa deńgeıi el boıynsha ortasha deńgeıden joǵary ekenin bildiredi.
2025 jyldyń alǵashqy toqsanynda Qostanaı oblysynda 1922 náreste dúnıege kelip, 1863 adam kóz jumǵan. Osylaısha, tabıǵı ósim nebary 59 adamdy qurady. Biraq bul jaǵymdy tendensıany kórsetedi: ólim-jitim deńgeıi 2024 jyldyń sáıkes kezeńimen salystyrǵanda 14%-ǵa tómendegen.
Mıgrasıa – oılanýǵa turarlyq jeke másele. Tek 2025 jyldyń alǵashqy úsh aıynda oblys mıgrasıa nátıjesinde 1004 adamǵa azaıǵan. Bul negizinen el ishindegi kósh-qonǵa baılanysty – myńnan astam adam Qazaqstannyń basqa oblystaryna qonys aýdarǵan.
"Negizgi sebep – ekonomıkalyq jáne bilim alý múmkindikterin izdeý. Jastar Astanaǵa, Almatyǵa jáne elimizdiń batys óńirlerine qonys aýdarýda", – dep málimdedi Ulttyq statısıka búrosy.