Jaz – kóńil kóteretin, sergektik pen serýenniń maýsymy. Ásirese, ásem Almatyda taza aýada dene qozǵalysyna den qoıǵan jandardyń qatary artyp keledi. Bul maýsym — densaýlyqty jaqsartyp, paıdaly ádetterdi qalyptastyrý úshin taptyrmas múmkindik. Biri tańǵy júgirýdi tańdasa, biri serýen qurady, endi biri tipti bıdi serik etedi.
Solardyń biri – tańǵy bıdi kúndelikti daǵdyǵa aınaldyrǵan erekshe jandar toby. Olar aptasyna eki ret Tereńqur boıynda jınalyp, taza aýada kóńildi yrǵaqpen bıleıdi. Bul topty horeograf, óner salasynyń ardageri — 72 jastaǵy Almat Qumarjanov basqarady.
Almat aǵa — kásibı horeograf, Abaı atyndaǵy Qazaq ulttyq pedagogıkalyq ýnıversıtetinde 15 jyldan beri horeografıa páninen sabaq beredi. Buǵan deıin Júrgenov atyndaǵy Qazaq ulttyq óner akademıasynda 20 jyldaı eńbek etken. Ózi de osy akademıada rejıser-horeograf mamandyǵyn támamdaǵan.
Bıdi 18 jasynan beri serik etken Almat Qumarjanov ashyq dalada, taza aýada bı sabaǵyn úıretýdi shamamen eki jarym aı buryn bastaǵan. Alǵashynda horeograf salaýatty ómir saltyn saqtaý klýbyna óziniń oqýshysynyń keńesimen óz qyzyǵýshylyǵymen úshin keledi. Al klýb jetekshisi bolsa, sol jerde bı jattyǵýyn ótkizýdi usynyp, tańǵy bı ıdeıasy osylaı júzege asyp ketedi.
Tańǵy 7:45-te bastalatyn bul sabaqtarǵa negizinen orta jáne úlken jastaǵy azamattar keledi.
– Bı degen – qozǵalys. Al kóshede júrgende durys tynys almaımyz. Demdi ala berip, ishke kirgen kómirqyshqyl gazyn tolyq shyǵarmaımyz. Al bı – durys tynys alýǵa úıretedi. Maǵan eń aldymen, mýzykanyń ózi unaıdy. Qazaq mýzykasy óte baı, – deıdi Almat Qumarjanov.
Qatysýshylar ne deıdi?
Bıdi kúndelikti daǵdyǵa aınaldyryp úlgergen qatysýshylardyń biri — 45 jastaǵy Nazgúl Tanasheva. Ol eki aıdan beri osy tańǵy bıge qatysyp júr.
– Qazir aıaq-qolym birge qozǵalady. Qımyldar men jattyǵýlardy tolyq túsinip, qaıtalap júrmin. Buryn bárin shatystyryp alatynmyn. Endi qozǵalystarym sınhrondy, denem ıkemge kelip qaldy. Ózimdi belsendi sezinemin, bıge qatysqan kúni jumysqa barǵanda da kóńilim kóterińki, ózimdi jaqsy sezinip júremin. Saǵat 9-ǵa deıin bıge qatysyp, keıin jumysqa úlgeremin, – deıdi ol.
Siz de taza aýada sergip, kóńil kótergińiz kelse — tańǵy bıge qosylyńyz! Qozǵalys — densaýlyqtyń kilti. Almat Qumarjanov syndy belsendi qozǵalysty nasıhattap júrgen jandar qataryna qosylamyn deýshilerge Tereńqur boıynda bı jattyǵýlary seısenbi jáne beısenbi kúnderi tańǵy 7:45-te ótedi.