Ómir úshin kúrestiń bıikte ótken sáti
2025 jylǵy 30 mamyrda Almaty–London baǵytyndaǵy áýe reısinde kútpegen jaǵdaı oryn aldy: jolaýshylardyń biri kenetten ózin jaısyz sezinip, jaǵdaıy kúrt nasharlaı bastady. Áýede medısınalyq quraldar men kómektesetin jaǵdaı shekteýli bolǵandyqtan, árbir sekýndtyń quny arta tústi.
Sol sátte ushaq bortynda Perınatologıa jáne balalar kardıohırýrgıasy ortalyǵynyń akýsher-gınekology, joǵary sanatty dáriger Saltanat Isaǵalıeva da ushyp kele jatqan edi. Ýaqyt uttyrmaı, ol naýqasqa kómektesýge kirisip, kásibı tájirıbesi men baısaldy áreketiniń arqasynda jolaýshynyń jaǵdaıyn turaqtandyryp úlgerdi, dep habarlaıdy aqshamnews.kz.
Pasıentke alǵashqy kómek kórsetilip, jaǵdaıy jaqsarǵansha Saltanat Qaıratqyzy janynan tabyldy: tekserý júrgizip, nusqaýlyqtar berip, qolynan kelgen barlyq jaǵdaıdy jasady. Jarty saǵattyń ishinde áıeldiń jaǵdaıy birtindep turaqtap, jolaýshy úshin ushý qaýipsiz boldy.
Saltanat Isaǵalıeva – medısınada 25 jyldan astam eńbek ótili bar, akýsherlik bólimsheniń jetekshisi. Onyń kásibı jolynda 10 myńnan astam bosandyrý men operasıa, júzdegen aman qalǵan sábı jáne alǵysyn jaýdyrǵan myńdaǵan pasıent bar.
Onyń eńbegi laıyqty baǵasyn alǵan: QR Densaýlyq saqtaý mınıstrliginiń «Densaýlyq saqtaý isiniń úzdigi» ataǵy, «Mamandyǵyna adaldyǵy úshin» qurmet medali jáne «Avısennanyń altyn juldyzy» tósbelgisi – sonyń dáleli.
Bul oqıǵa tek kásibılik emes, naǵyz dárigerlik mısıa — janashyrlyq, jaýapkershilik pen árdaıym kómektesýge daıyn turýdyń úlgisi.