Qazaqstanda 2025 jylǵy 1 qańtardan bastap kúshine engen jańa jeńildetilgen erejeler boıynsha memlekettik satyp alý týraly alǵashqy sharttar jasaldy, dep habarlaıdy aqshamnews.kz.
Olardy qabyldaý jobalardy, sonyń ishinde áleýmettik mańyzy bar jobalardy jedel iske qosýǵa jáne olardyń baǵasynyń kóterilý qaýpin azaıtýǵa múmkindik beredi. Jeńimpazdar negizinen jergilikti kompanıalar bolady, bul aımaqtardyń bıznesi men ekonomıkasyna qoldaý bolyp sanalady.
Memleket basshysy 2024 jylǵy 1 shildede rásimderdi ońaılatýǵa jáne búrokratıadan aryltýǵa baǵyttalǵan «Memlekettik satyp alý týraly» jańa Zańǵa qol qoıdy. Zań sheńberinde memlekettik satyp alýdy júzege asyrý merzimin barynsha qysqartýdy qamtıtyn jańa Erejeler qabyldandy.
Máselen, konkýrs tásilimen ótkiziletin satyp alý boıynsha tıisti qujattamany talqylaý 5 kúnnen 2 jumys kúnine deıin, ótinimderdi qabyldaý — 15 kúnnen 5 jumys kúnine deıin, ótinimderdi qaraý jáne qorytyndylaý — 10 kúnnen 3 jumys kúnine deıin qysqartyldy. Osylaısha, konkýrstar men aýksıondar boıynsha jeńimpaz eń kóp degende 10 jumys kúni ishinde anyqtalady.
Reıtıńtik-baldyq júıeni qoldaný arqyly ótkiziletin konkýrs (avtomattandyrylǵan satyp alý tásili, jeńimpazdy veb-portal aıqyndaıdy) arqyly satyp alý jeńimpazdary jınalǵan upaılar negizinde 5 jumys kúni ishinde (buryn merzimi 29 jumys kúnin quraǵan) aıqyndalady. Olar jumys tájirıbesi, turaqty salyq aýdarymdarynyń bolýy, keshiktirýlerdiń bolmaýy jáne basqalary úshin beriledi.
Baǵa usynystaryn suratý tásilimen satyp alý merzimi 5 kúnnen 2 kúnge deıin qysqartyldy.
Sondaı-aq jergilikti jetkizýshiler úshin shartty jeńildikter 1%-dan 2%-ǵa deıin ulǵaıtyldy.