Salany sıfrlandyrýǵa erekshe kóńil bólinip jatyr.
Qazaqstanda kórsetiletin memlekettik qyzmettiń 93,4 paıyzy elektrondy formatqa aýystyryldy. Bul týraly QR Memlekettik qyzmet isteri agenttiginiń keńeıtilgen alqa otyrysynda aıtyldy, dep habarlaıdy Almaty-akshamy.kz QazAqparatqa silteme jasap.
«Aldaǵy ýaqytta memlekettik qyzmetter sapasyn baǵalaýdy kezeń-kezeńmen onlaın formatqa kóshirý josparlanýda. Elektrondyq qyzmetterdi damytýǵa keler bolsaq, búginde memlekettik qyzmet kórsetý salasyn sıfrlandyrýǵa erekshe kóńil bólinýde. Tizilimge sáıkes, memlekettik qyzmetterdiń 93,4% elektrondyq formatqa aýdaryldy», - dedi QR Memlekettik qyzmet isteri agenttiginiń tóraǵasy Darhan Jazyqbaev atalǵan jıynda.
Onyń aıtýynsha, atalǵan baǵyttaǵy oń ózgeristerge qaramastan, jekelegen memlekettik qyzmetter boıynsha problema bar.
«Agenttik turaqty negizde «elektrondyq úkimet» portalynda memlekettik qyzmetterdiń kórsetilýine monıtorıń júrgizip, sonyń qorytyndysy boıynsha portalda elektrondyq qyzmetterdiń 189 túrine qoljetimdiliktiń joqtyǵyn anyqtady. Sonymen qatar, agenttiktiń jedel monıtorıńiniń arqasynda «elektrondyq úkimet» portalynda 158 elektrondyq qyzmettiń qoljetimdiligi qamtamasyz etildi», - deıdi ol.
Sonymen qatar agenttik basshysy memlekettik qyzmet salasy boıynsha álemdik úzdik tájirıbelerdiń zertteletindigin tilge tıek etti.
«Memlekettik qyzmetshilerdiń ózine júktelgen tapsyrmany utymdy oryndaýy úshin, ıkemdi jumys kestesi men qashyqtyqtan jumys isteý jaǵdaıyn jasaý qajet. Iaǵnı jumys jasaý keńistigindegi tıimdi jaǵdaılardy paıdalaný tájirıbesin keńeıtýimiz kerek. Sol sekildi aldaǵy ýaqytta agenttik sarapshylarmen ortaq talqylaýdyń qorytyndysyn jáne álemdik tájirıbeni jan-jaqty zerdelep, naqty usynystardy daıyndaıdy», - dedi D.Jazyqbaev.