Túrkistan oblysyndaǵy shaqyrý barysymen Qorǵanys mınıstrligi Tárbıe jáne ıdeologıalyq jumys departamentiniń bastyǵy ádilet polkovnıgi Tileýhan Basqojaev tanysty, dep habarlaıdy almaty-akshamy.kz
Ol oblystyq qorǵanys isteri jónindegi departamentinde, Kentaý qalasynyń jınaqtaý pýnktinde bolyp, áskerge shaqyrylýshylardyń medısınalyq tekserýden, psıhologıalyq testileýden ótý sapasymen tanysty.
Sarbaz analary komıtetiniń ókilderimen jáne Qarýly kúshterdiń ardagerlerimen kezdesý ótti. Búginde olar áskerge shaqyrylýshylarǵa túsindirý jumystaryn júrgizip, olardy irikteý prosesinde týyndaıtyn problemalyq máselelerdi sheshý jumystaryna belsendi túrde aralasyp keledi.
Áskerge shaqyrylýshylarmen jáne olardyń ata-analarymen bolǵan áńgimede Tileýhan Qalılaıuly eldi qorǵaý - árbir er adamnyń qasıetti paryzy jáne mindeti ekenin atap ótti.
– Bizdiń ata-babalarymyz ǵasyrlar boıy táýelsizdik úshin kúresken, al biz, olardyń urpaǵy, ony qorǵaýymyz kerek. Qyzmet senderdi shynyqtyrady, ári bolashaqtaǵy mansap úshin de tamasha bastama bolady, – dedi ádilet polkovnıgi Tileýhan Basqojaev.
Aıta ketý kerek, kúzgi áskerge shaqyrý naýqanynyń jospary boıynsha Túrkistan oblysynan 18 ben 27 jas aralyǵyndaǵy 2 myńnan astam er adam merzimdi áskerı qyzmetke shaqyrylady. Búgingi tańda Qarýly kúshterdiń áskerı bólimderine, UQK Shekara qyzmetine jáne Memlekettik kúzet qyzmetine óńirden 700-ge jýyq adam jiberildi. Kúzgi shaqyrý naýqany aǵymdaǵy jyldyń 31 jeltoqsanyna deıin jalǵasady.