Astanada, kitaphanashylar kúni qarsańynda, Qazaqstannyń kitaphana salasyn damytýǵa baılanysty ózekti máseleler talqylandy, dep habarlaıdy almaty-akshamy.kz
Mádenıet jáne aqparat mınıstri Aıda Balaevanyń tóraǵalyǵymen ótken dóńgelek ústel jumysyna Parlament depýtattary, fılologıa ǵylymdarynyń doktorlary, akademıkter, kitaphana isiniń ardagerleri jáne t. b. qatysty.
İs-sharany ashqan QR Mádenıet jáne aqparat mınıstri Aıda Balaeva túrki aqyny Álisher Naýaıdiń: "Kitap - aqylǵa aqy suramaıtyn altyn qazyna", - degen sózin mysalǵa keltirdi.
Ol osy baǵaly qazynaǵa qyzmet kórsetetin kitaphanalar men kitaphanashylardyń jaǵdaıy eldiń órkendeýimen jáne Qazaqstannyń senimdi bolashaǵymen tikeleı baılanysty ekenin atap ótti.
""Ádiletti Qazaqstan – Adal azamat" Ulttyq quryltaıynyń ekinshi otyrysynda Memleket basshysy "as urpaqtyń kitapqa degen qushtarlyǵyn oıatý" naqty mindetin qoıdy.
Prezıdent óziniń aldyńǵy sózderinde de kitaphana salasyn damytýǵa erekshe nazar aýdardy. Osyǵan baılanysty biz Prezıdenttiń barlyq tapsyrmalaryn oryndaý boıynsha qajetti sharalardy qabyldap jatyrmyz", - dedi Aıda Balaeva, dóńgelek ústelge qatysýshylardy osy baǵyttaǵy jumys nátıjeleri týraly habardar ete otyryp.
Atap aıtqanda, mınıstr kitaphanashylardyń jalaqysyn 2025 jylǵa qaraı 100%-ǵa arttyrý maqsatynda kitaphana qyzmetkerleriniń jalaqysyn jyl saıyn 25%-ǵa ulǵaıtý jónindegi jumys týraly atap ótti.
Kitap qoryn jańartý boıynsha da birqatar sharalar qabyldanýda. Sońǵy 5 jylda, memlekettik tapsyrys aıasynda, 4,5 mıllıon kitap shyǵaryldy.
Sheteldik bestsellerlerdi qazaq tiline aýdarý - mańyzdy aspekt bolyp tabylady. Sondaı-aq, oqyrmandardyń suranysyna saı kitaptar shyǵarý úshin oqyrmandar arasynda arnaıy áleýmettik saýalnamalar júrgizý josparlanýda. Sonymen qatar, ulttyq elektrondyq kitaphanany damytý boıynsha jumystar da belsendi júrgizilýde.
"Qazaqstannyń elektrondyq kitaphanasy" jobasy aıasynda oqyrmandar "biryńǵaı bılet" arqyly elimizdiń kez kelgen kitaphanasynyń elektrondyq bazasyna qoljetkize alatyndaı barlyq kitaphanalardy biryńǵaı aqparattyq júıege qosý josparlanýda. Budan bólek, dóńgelek ústelge qatysýshylar osy salany damytýǵa qatysty óz pikirlerimen bólisti.
Qorytyndyda mádenıet jáne aqparat mınıstri is-shara barysynda aıtylǵan barlyq usynystar eskerilip, taldanyp, jumysqa qabyldanatynyn atap ótti.
Kerek derek
Elimizde 11 myńǵa jýyq kitaphana jumys isteıdi, olardyń shtatynda 25 myńnan astam adam bar, kitap qory 328 mıllıon danadan asty. Kitaphana qyzmetterin paıdalanýshylar sany 9,5 mıllıonǵa jetken.