Elimizde 2013 jyldan bastap Otbasy kúni atalyp ótedi.
Búgin elimizde Otbasy kúni merekesi atalyp ótilýde. Atalǵan mereke elimizde 2013 jyldan bastap toılanyp keledi, dep habarlaıdy Almaty-akshamy.kz QazAqparat-qa silteme jasap.
Memleket bizdiń qoǵamda negizgi otbasylyq qundylyqtardy nyǵaıtýdyń mańyzdylyǵyna erekshe nazar aýdaryp otyr. Qazaqstanda Otbasy kúni QR Tuńǵysh Prezıdenti - Elbasynyń Jarlyǵymen 2013 jyldan bastap qyrkúıek aıynyń ekinshi jeksenbisinde atalyp ótedi. Bıyl bul data 12 qyrkúıekke sáıkes keldi. Bıyl aıtýly kún qarsańynda elordadaǵy «Astana-Báıterek» monýmentinde jas jubaılar saltanatty túrde nekelesti. Sharaǵa QR Aqparat jáne qoǵamdyq damý vıse-mınıstri Asqar Ýmarov qatysty.
«Jaqynda ǵana Memleket basshysy Qasym-Jomart Toqaev Qazaqstan halqyna Joldaýynda Otbasylyq jáne genderlik saıasat konsepsıasyna eleýli ózgerister engizý qajettigin atap ótti. Jyl saıyn Qazaqstanda 100 myńǵa jýyq jas jubaılar neke qıady. Búgingi osy saltanatty sharanyń «Báıterek» monýmentinde ótýi – sizderdeı jas otbasylardyń ósip kele jatqan aǵashtaı tarıhı tamyryn saqtap, myqty tiregi bar, bolashaqqa umtylysy bar memleketke aınalatynyn bildiredi», - degen edi Asqar Ýmarov.
Elimizde Otbasy qundylyǵyn saqtap, dáripteý maqsatynda jyl saıyn aýqymdy sharalar qolǵa alynyp jatyr. Sonyń biri «Mereıli otbasy» — ulttyq baıqaýy. Atalǵan baıqaý Elbasynyń bastamasymen 2013 jyly qurylǵan bolatyn. Maqsaty – otbasy ınstıtýtyn, otbasylyq qundylyqtardy nyǵaıtý, bala tárbıesindegi ata-analardyń jaýapkershiligin arttyrý, qazaqstandyq otbasynyń jaǵymdy ımıjin nasıhattaý. Jyl saıyn ótetin baıqaýda respýblıka boıynsha 17 úzdik otbasy anyqtalady. Bıyl konkýrstyq komısıaǵa barlyǵy 2 768 ótinim kelip túsipti (68,7% aýyldyq otbasy, 31,3% qalalyq otbasy). Memleket basshysy bıylǵy Joldaýynda elimizdiń Otbasylyq jáne genderlik saıasat tujyrymdamasyna ózgerister engizý kerektigin alǵa tartty.
«Osy jazdyń basynda meniń Jarlyǵyma sáıkes Úkimet Adam quqyǵyn qorǵaý jónindegi keshendi jospardy bekitti. Osy mańyzdy qujat Qazaqstanda adam quqyǵyn qorǵaý júıesin odan ári jetildirý úshin uzaq merzimdi ınstıtýttyq negiz qalyptastyrady. Atap aıtqanda, keshendi jospar qabyldanǵannan keıin genderlik teńdikti qamtamasyz etý úshin belsendi jumys bastaldy. Osyǵan oraı áıelderdiń qoǵamdaǵy ekonomıkalyq jáne saıası ustanymyn barynsha qoldaýdy qamtamasyz etken jón. Bul jumysqa Prezıdent Ákimshiligi jaýapty. Otbasylyq jáne genderlik saıasat tujyrymdamasyna da ózgerister engizgen jón», - dedi Qasym-Jomart Toqaev Joldaý barysynda.