2025 jylǵy 13 naýryzdan bastap Qazaqstanda Ákimshilik kodekske ózgerister engizilip, keıbir jol qozǵalysy erejelerin (JQE) buzǵany úshin aıyppuldar ósedi, jańa baptar qosylady, al keıbir jazalar jeńildetiledi. Bul týraly Aqshamnews.kz saıty habarlaıdy.
Qatańdatylǵan jazalar:
-
Temirjol ótkelderin ótý erejelerin buzý: Buryn 10 AEK mólsherinde aıyppul salynsa, endi bul soma 20 AEK-ke deıin ulǵaıtyldy. Eger júrgizýshi osy erejeni buzyp, jol-kólik oqıǵasyna sebepker bolsa (jábirlenýshilersiz), ol 9 aıǵa júrgizýshi kýáliginen aıyrylady.
-
Jedel járdem jáne polısıa kólikterine jol bermeý: Eger júrgizýshi jedel járdem nemese polısıa kóligine jol bermese, aıyppul mólsheri 7 AEK-ten 20 AEK-ke deıin ósti. Qaıtalanǵan jaǵdaıda aıyppul 15 AEK-ten 40 AEK-ke deıin ulǵaıtylady.
Jeńildetilgen jazalar:
-
Jábirlenýshilersiz jol-kólik oqıǵalary: Buryn mundaı jaǵdaılarda júrgizýshi 6 aıǵa kýáliginen aıyrylatyn bolsa, endi 20 AEK mólsherinde aıyppul salynady. Tek bir jyl ishinde qaıtalanǵan jaǵdaıda nemese jábirlenýshiler bolǵan jaǵdaıda ǵana 9 aıǵa júrgizýshi kýáliginen aıyrý jazasy qoldanylady.
-
Tólenbegen turaq úshin aıyppul: Aıyppul mólsheri 3 AEK-ten 1 AEK-ke deıin tómendetildi. Qaıtalanǵan jaǵdaıda aıyppul 5 AEK-ten 2 AEK-ke deıin azaıtyldy.
Qoǵamdyq jumystar:
2025 jyldyń 1 qyrkúıeginen bastap jańa jaza túri – mindetti qoǵamdyq jumystar engiziledi. Mysaly, jedel járdem nemese polısıa kóligine qaıtadan jol bermegeni úshin júrgizýshige 40 AEK aıyppul salynýmen qatar, 20 saǵattyq qoǵamdyq jumystar (mysaly, kóshelerdi tazalaý) taǵaıyndalýy múmkin.
Jaıaý júrginshiler men samokat júrgizýshilerine qatysty:
Eger jaıaý júrginshi nemese samokat júrgizýshisi jol qozǵalysy erejelerin buzyp, onyń nátıjesinde jol-kólik oqıǵasy oryn alsa (jyl ishinde qaıtalanǵan jaǵdaıda), olar da 20 saǵattyq qoǵamdyq jumystarǵa tartylýy múmkin.
Qosymsha ózgerister:
-
Kólik quraldaryn qaıta jabdyqtaý: Eger júrgizýshi kóligin qaıta jabdyqtap, ony tıisti organdarda tirkemese nemese tirkelgen jabdyqty óz betimen alyp tastasa, ákimshilik jaýapkershilikke tartylady.
-
Jolaqy tólemegeni úshin aıyppul: Qoǵamdyq kólikte jolaqy tólemegen jolaýshylarǵa 2 AEK (7 864 teńge) mólsherinde aıyppul salynady.
Bul ózgerister jol qozǵalysy erejelerin buzýdy azaıtý jáne jol qaýipsizdigin arttyrý maqsatynda engizildi.