Qazaqstandyq avıakompanıalarǵa sot sheshiminsiz jolaýshylardy «qara tizimge» óz erkimen engizýge tyıym salynady.
Azamattar bul tizimge tek ushaq bortyndaǵy quqyqbuzýshylyq úshin jáne olardy qylmystyq nemese ákimshilik jaýapkershilikke tartý nátıjesinde kinási dáleldengen jaǵdaıda ǵana engiziledi, dep habarlaıdy Almaty-akshamy.kz
Bul normalar Májiliste maquldanǵan kólik máseleleri jónindegi zań jobasynda aıqyn kórsetilgen. Sondaı-aq, qujatta «ádil mádenıet» uǵymyn engizý qarastyrylǵan. Onyń negizgi qaǵıdaty - azamattyq avıasıa salasyndaǵy qasaqana quqyq buzýshylyqtarǵa nemese nemquraıly minez-qulyqqa tózbeýshilik. Jańa normalar áýe tasymaldaýshylardyń kesirinen ushaqtyń ár saǵatqa keshigýi úshin aıyppul salýdy qarastyrady. Sonymen qatar, eger avıakompanıalar reısti burynǵydaı 10 emes, 8 saǵatqa keshiktiretin bolsa, jolaýshylardy qonaq úı jáne tamaqpen qamtamasyz etýi tıis.
"Depýtattar usynǵan norma bekitilgen. Eger avıakompanıanyń kesirinen reıstiń keshigýi oryn alsa, onda olar jaýapty bolady. Sebebi bizde avıakompanıalarymyz osyndaı qatelikterge boı berip jatady. Bul qalaı júzege asady? Reıstiń keshikken ár saǵatyna 3 prosent aıyppul qosylady, biraq aıyppul quny túptep kelgende bılet baǵasynan artyq bolmaıdy. Mehanızm ózinen-ózi jumys isteı beredi. Mysaly, siz bıletti 20 myńǵa satyp aldyńyz delik, ár saǵat úshin 3 paıyz, ıaǵnı 20 myń teńgeden paıyzdar alynyp otyrady", - dedi QR Ekonomıkalyq reformalar jáne óńirlik damý komıtetiniń tóraǵasy Albert Raý.
Aıta keteıik, engizilgen túzetýlerge sáıkes, Qazaqstanda jolaýshylar tasymalynyń qaýipsizdigi transporttyń barlyq túrine kúsheıtiledi.