Paıdalanylmaı jatqan jerlerdiń 90%-ǵa jýyǵy shaǵyn kásipkerlik sýbektisine tıesili.
2022 jyly Qazaqstanda aýyl sharýashylyǵy jerlerin paıdalanbaı jatqan 1901 shaǵyn kásipkerlik sýbektisi tekseriledi, dep habarlaıdy Almaty-akshamy.kz Aýyl sharýashylyǵy mınıstrliginiń baspasóz qyzmetine silteme jasap.
Eske sala keteıik, 2022 jyldyń 3 qańtarynda paıdalanylmaıtyn aýyl sharýashylyǵy jerlerin májbúrlep alyp qoıý merzimin qatarynan 2 jyldan 1 jylǵa deıin qysqartýdy jáne memlekettik baqylaýdyń jańa tetigin engizýdi kózdeıtin norma qabyldanǵan bolatyn. Bul rette paıdalanylmaı jatqan jerlerdiń 90%-ǵa jýyǵy shaǵyn kásipkerlik sýbektisine tıesili.
«Erekshe jaǵdaılardy qospaǵanda, Prezıdenttiń shaǵyn jáne mıkrokásipkerlik sýbektilerine qatysty tekserýlerge moratorıı engizý týraly Jarlyǵyn buza otyryp, tekserýler júrgizý múmkin emes. Osyǵan baılanysty Aýyl sharýashylyǵy mınıstrliginiń 2021 jylǵy 26 shildedegi buıryǵymen «jappaı qater» uǵymyn aıqyndaý jónindegi usynymdar bekitildi. Aýyl sharýashylyǵy mınıstrliginiń 2022 jylǵy 4 mamyrdaǵy № 139 buıryǵyna sáıkes, «jappaı qater» sheńberinde jalpy alańy 5,8 mıllıon gektardy quraıtyn 1901 shaǵyn kásipkerlik sýbektilerine qatysty jospardan tys tekserýler júrgizý josparlanýda», - dedi Aýyl sharýashylyǵy vıse-mınıstri Ábilhaıyr Tamabek.
Buǵan qosa, ol jer paıdalanýshylardy ekonomıkalyq májbúrleýge jaǵdaı jasaý úshin paıdalanylmaıtyn aýyl sharýashylyǵy jerlerine salyq mólsherlemeleri 10-nan 20 esege deıin ulǵaıtylǵanyn aıtty.
«Tájirıbe kórsetkendeı, osyndaı is-áreketter nátıjesinde jer paıdalanýshylar ulǵaıtylǵan salyqty tólemeý úshin, jerlerdi óz erkimen qaıtaryp jatady. Joǵaryda atalǵan is-sharalar nátıjesinde, ótken jylmen salystyrǵanda, bıyl 5 mıllıon gektar paıdalanylmaıtyn aýyl sharýashylyǵy jerlerin memlekettik menshikke qaıtarýdy josparlap otyrmyz. Bul rette paıdalanylmaıtyn jáne zań buzýshylyqpen berilgen jerlerdi alyp qoıý bir kúnde bitetin jumys emes ekenin atap ótkim keledi. Sebebi Konstıtýsıanyń jáne Azamattyq kodekstiń normalaryna sáıkes, menshik quqyǵy qorǵalǵan. Al alyp qoıý prosesi tek sot arqyly júzege asyrylady», - dep tolyqtyrdy spıker.
Qazirgi ýaqytta oblystarda árbir óńirdegi barlyq múddeli quqyq qorǵaý jáne memlekettik organdardyń qyzmetkerlerin tarta otyryp, vedomstvoaralyq toptar qurý boıynsha jumystar júrgizilip jatyr.
Aýyl sharýashylyǵy maqsatyndaǵy jerlerdi utymdy paıdalaný jáne halyqty aýyldardaǵy aýyl sharýashylyǵy jerlerimen qamtamasyz etý problemasy barlyq óńirdegi ótkir másele bolyp otyr.
Azamattardyń ótinishi boıynsha ótken jyly respýblıkada jer zańnamasyn saqtaý boıynsha 175 jospardan tys tekserý júrgizilip, kináli laýazymdy tulǵalarǵa qatysty jalpy somasy 875,1 myń teńgege 55 ákimshilik óndiris qozǵaldy.