Qyrkúıek aıynyń ortasynan bastap Qazaqstanda jatyr moıny obyrynyń negizgi qozdyrǵyshy bolyp tabylatyn adam papıllomasy vırýsyna (APV) qarsy qyzdardy jalpyulttyq vaksınasıalaý bastaldy.
QR Bas memlekettik sanıtarıalyq dárigeriniń 17 qyrkúıektegi qaýlysyna sáıkes josparly túrde 11 jastaǵy qyzdar vaksınasıalaýǵa jatady. Sondaı-aq, 12 jastan 13 jasqa deıingi qyzdarǵa arnalǵan ımmýndaý júrgiziledi, dep habarlaıdy aqshamnews.kz Densaýlyq saqtaý mınıstrligine silteme jasap.
Bul mańyzdy is-shara elde qaýipti ınfeksıanyń taralýyn tómendetýge jáne onkologıalyq aýrýlardyń paıda bolý qaýpin azaıtýǵa baǵyttalǵan. Qazirgi ýaqytta ımmýndaý sheńberinde tıisti jastaǵy oqýshy qyzdar vaksınasıalanýda. Vaksınasıalaý mektepter men emhanalardyń medısınalyq kabınetterinde, ata-analardyń nemese zańdy ókilderdiń aqparattandyrylǵan kelisimin alǵannan keıin júrgiziledi.
Jatyr moıny obyry Qazaqstandaǵy barlyq jastaǵy áıelderdiń arasynda eń kóp taralǵan ekinshi qaterli isik jáne 25 pen 44 jas aralyǵyndaǵy áıelder óliminiń ekinshi sebebi bolyp tabylady. Jyl saıyn elde bul aýrýdyń 1900-ge jýyq jańa jaǵdaıy tirkeledi. Ǵylymı zertteýler jatyr moıny obyrynyń negizgi sebebi APV ınfeksıasy ekenin dáleldedi. APV vaksınasy óziniń tıimdiligi men qaýipsizdigin halyqaralyq deńgeıde dáleldedi.
Búgingi tańda APV vaksınasy álemniń 135 elinde qoldanylady. Birqatar elderde vaksınasıalaýdyń arqasynda áıelderdiń arasynda APV-nyń taralýy 90%-ǵa tómendedi. Búgingi kúni respýblıka boıynsha APV-ǵa qarsy vaksınasıalaýdyń kúndelikti monıtorıńiniń nátıjeleri boıynsha 22,2 myń bala, onyń ishinde 11 jasta – 14 myń bala, 12-13 jasta-8,2 myń bala egildi.