Jumysshy mamandyqtar jyly aıasynda Túrkistan qalasynda Qazaqstan Respýblıkasynyń Oqý-aǵartý mınıstrligi men oblys ákimdiginiń birlesip uıymdastyrýymen kolej stýdentteriniń «Eńbek kýbogi – 2025» respýblıkalyq spartakıadasy bastaldy.
Aıta ketý kerek, kolej stýdentteri arasynda mundaı sporttyq shara keń kólemde alǵash ret ótkizilýde, dep habarlaıdy aqshamnews.kz.
Spartakıadanyń resmı ashylýyna qatysqan Oqý-aǵartý mınıstri Ǵanı Beısembaev el ekonomıkasynyń damýynyń negizgi tetikteriniń birine aınalǵan tehnıkalyq jáne kásiptik bilimdi transformasıalaý - sapaly kadrlyq áleýetti damytý, kolejderdi bıznespen, halyqaralyq bilim keńistigimen ıntegrasıalaý, jumysshy mamandyqtaryn tańdaǵan jastar úshin perspektıvaly keleshek qalyptastyrý baǵyttary boıynsha júzege asyrylatynyn atap ótti.
«Memleket basshysynyń bastamasymen sońǵy eki jylda kolej stýdentteriniń shákirtaqysy eki esege artty. Stýdentter kolej qabyrǵasynda startap jobalarǵa qatysyp, kásipkerlik daǵdylaryn meńgerýde. Memleket sizderge zor úmit artady. «Eńbek kýbogi» spartakıadasy sizderdiń el erteńiniń tiregi bolatyn azamat retinde qalyptasýlaryńyzǵa jol ashatyn mańyzdy bastama bolady dep senemin. Adal eńbek pen sapaly bilim ǵana jarqyn bolashaqtyń kepili bolmaq», – dedi mınıstr.
Spartakıadaǵa elimizdiń barlyq óńirinen 2000-ǵa jýyq stýdent qatysyp, fýtzal, toǵyzqumalaq, shahmat, ústel tenısi jáne voleıbol syndy bes sport túrinen baq synaýda.
Aıta ketý kerek, spartakıada bes kúnge jalǵasady. Onyń qorytyndysy boıynsha úzdik oıyn kórsetken stýdentterdiń Qoja Ahmet Iasaýı atyndaǵy halyqaralyq qazaq-túrik ýnıversıtetine bilim grantyn utyp alý jáne elimizdiń jetekshi kásiporyndarynan shaqyrtý alý múmkindigi bar