Keshe Ǵ.Músrepov atyndaǵy Qazaq Memlekettik akademıalyq balalar men jasóspirimder teatrynda Mahambet atyndaǵy Akademıalyq qazaq drama teatrynyń Almatydaǵy gastróldik kúnderi ashyldy.
Mahambet teatry – elimizdegi kóne ári irgeli ujymdardyń biri. Ósý, órleý, damý jolynda talaı belesti basynan ótkerip, ónerpazdardyń birneshe býynyn almastyrǵan bul teatr dástúrge beriktigimen, ónerge adaldyǵymen erekshelenedi. Óziniń 87-nshi kóktemin Alataý bókterinde qarsy alǵan teatr ujymy úshin bul óner sapary dástúrli desek te bolady. Óıtkeni trýppa ártisteri sońǵy birneshe jyl boıy sáýir aıynda Almaty turǵyndarymen júzdesip, ónerin pash etip keledi.
«Qashannan óner men mádenıettiń, sulýlyq pen saǵynyshtyń, jastyq pen mahabbattyń sımvolyna aınalǵan arý Almatynyń turǵyndarymen júzdeskenimizge qýanyshtymyz. Rýhanı astanamyzdyń talǵampaz kórermenderine teatr repertýaryndaǵy úzdik qoıylymdarymyzdy usynamyz. Bul kúnder – biz úshin jańa shyǵarmashylyq izdenistiń, áserli kezdesýler men shabytty sátterdiń bastaýy ispetti», – deıdi atyraýlyq ónerpazdar.
Sharanyń ashylý saltanatynda sóz alǵan, QR eńbek sińirgen qaıratkeri Amantaı Berǵalıev Almaty qalasy Mádenıet basqarmasynyń atynan iltıpat bildire otyryp: «Bes kúnge sozylatyn óner toıyn birge tamashalap, qımaı qoshtasatynymyzǵa kúmán joq», – dep saparlap kelgen ujymǵa sáttilik tiledi.
Sahna tórine kóterilgen Qazaqstan Jazýshylar Odaǵynyń tóraǵasy Mereke Qulkenov elimizde teatrǵa degen yqylas óte jaqsy ekenin aıtty. «Qaı jerde de teatrǵa keletin kórermen kóbeıip kele jatyr. Bul – halqymyzdyń jan dúnıesiniń baıyp kele jatqanynyń kórinisi. Teatrsyz, ádebı kitapsyz ómir súrý shynynda da óte kóńilsiz bolar edi. Biz teatrdan ózimizdiń basymyzdan kúndelikti ótip jatqan ómirdiń kórkem kórinisin, túrli problemalardy, elge, jerge degen mahabbatty, adam baıqaı bermeıtin sezimderdi kóremiz», – dep, sahnagerlerdiń jumysyna tánti ekenin jetkizdi.
Sondaı-aq, Mereke Qulkenov arǵy-bergi tarıhtan da syr tartyp: «Mahambet atyndaǵy teatr ultymyzdyń nebir marǵasqa tulǵalaryn qynadaı qyryp tastaǵan úreıli shaqta quryldy. Sol kezdiń ózinde B.Maılın, M.Áýezov, Ǵ.Músrepov shyǵarmalaryn, orys klasıkteriniń pesalaryn sahnalady. 87 jas – adam balasy úshin qarttyq kezeń bolsa, al teatr úshin, bul kerisinshe, jasaryp, jańǵyryp, jandanǵan shaq bolyp tur. Teatrda burynǵydan basqasha lep, jańasha ekpin bar», – deı kele, gastról shymyldyǵy «Qasym han» spektaklimen ashylýynyń ózi jaıdan-jaı emes ekenin, Qazaq memleketiniń qalyptasýyna, nyǵaıýyna ulanǵaıyr eńbek sińirgen Qasym han Atyraýda, qasıetti Saraıshyq topyraǵynda jatqanyn tilge tıek etti.
– «Aldyńǵy tolqyn – aǵalar, keıingi tolqyn – iniler» demekshi, teatrymyzdyń quramy búginde aıtarlyqtaı jasardy. Almatydaǵy T.Júrgenov atyndaǵy Óner akademıasyn támamdaǵan jas akterler men aktrısalar qatarymyzǵa qosyldy. Sondaı-aq Astanadaǵy «Shabyt» ýnıversıtetinen kelgen jastar da bar. Mine, osyndaı úlken qurammen aldaryńyzǵa synaq tapsyrýǵa, esep berýge kelgendeı bolyp turǵan jaıymyz bar, – degen teatr basshysy Saǵyntaı Satybaldyuly: «Buryndary el aýzynda: «Oryndaýshysynan tyńdaýshysy myqtyraq bolýy kerek» deıtin sóz bolatyn. Qazir endi «tyńdaýshysy ǵana emes, qoldaýshysy da myqtyraq bolýy kerek-aý» dep oılaıtynymyz ras. Óıtkeni gastróldik sapar, úlken ujymnyń ózge óńirlerge, alys-jaqyn shet elderge shyǵyp turýy úlken qarajatty qajet etetini belgili», – dep, teatrǵa materıaldyq-tehnıkalyq turǵyda qoldaý bildirgen jergilikti óńir basshylyǵyna rızashylyǵyn jetkizdi.
Óner saparynyń alǵashqy kúninde kórermenderge belgili qalamger Asylbek Yqsannyń «Qasym han» tarıhy dramasy usynyldy. Teatrdyń gastróldik repertýary ary qaraı «Mahabbat, qyzyq mol jyldar» (Á.Nurshaıyqov), «Baıandy baq» (M.Otarbaı), «Tolqyndar jaǵada óledi» (Á.Dáýletbaeva) qoıylymdarymen jalǵasyp, ómirden erte ketken tanymal bard aqyn Tabyldy Dosymov rýhyna arnalǵan «Qyr balasy» (Á.Rahat) spektaklimen túıindelmek.