Májilis ishki ister organdarynyń qyzmeti salasyndaǵy normalardyń artyq (shamadan tys) zańnamalyq reglamenttelýin bolǵyzbaý máseleleri boıynsha zańnamalyq túzetýler jobasyn birinshi oqylymda maquldady.
Bul zań jobasy «Memlekettik apparattyń qyzmetin búrokratıadan aryltý jónindegi sharalar týraly» 2022 jylǵy 13 sáýirdegi Prezıdent Jarlyǵyn iske asyrý maqsatymen ázirlengen. Túzetýlerge sáıkes «jergilikti polısıa qyzmeti» uǵymy alynyp tastalady, dep habarlaıdy aqshamnews.kz Májiliske silteme jasap.
Bul 2016 jyly qurylǵan JPQ óz tıimdiligin is júzinde dáleldeı almaǵanymen baılanysty. JPQ quramynda ýchaskelik ınspektorlar, patrúldik, ıývenaldy, tabıǵatty qorǵaý polısıasy jáne áıelderdi zorlyq-zombylyqtan qorǵaý bólimsheleri bolǵan.
Alaıda zań jobasyn ázirleýshilerdiń aıtýynsha, bul qyzmet ózine júktelgen negizgi mindetterdi, ıaǵnı, qoǵamdyq tártipti saqtaý, quqyq buzýshylyqtardyń aldyn alý jáne jol qaýipsizdigin qamtamasyz etýdiń ornyna, abattandyrý erejeleriniń buzylýyn anyqtaý, qurylys qaldyqtaryn shyǵarý syndy ekinshi kezektegi jumystarmen aınalysa bastaǵan.
İshki ister mınıstrligi JPQ men Ákimshilik polısıa basqarmasyn qaıta uıymdastyryp, olardyń bazasynda eki jańa basqarma – quqyq buzýshylyqtardyń aldyn alý jáne qoǵamdyq qaýipsizdikti qamtamasyz etý basqarmalaryn qurýdy usynyp otyr. Ár qyzmet óziniń tikeleı mindetterimen aınalysady. Sondaı-aq, kólik polısıasy bólimshelerin retke keltirý maqsatymen «jelilik» degen termındi «kólikte» dep ózgertý usynylýda.
Al áskerı-tergeý organdary ishki ister organdarynyń aýmaqtyq qurylymynan alynyp tastalady, sebebi olar İİM quramyndaǵy derbes bólimshe retinde bólingen. Sonymen qatar, ákimshilik qamaýǵa alynǵandardy (ártúrli quqyqbuzýshylyqtar, sot aktilerin, alımentti oryndamaý jáne t.b.) ustaýǵa arnalǵan arnaıy qabyldaý oryndarynda oryn jetispeýshiligine baılanysty, zań jobasynda olardy ýaqytsha ustaýǵa arnalǵan qabyldaý-bólý oryndarynda (turaqty mekenjaıy joq adamdarǵa arnalǵan) ustaý tártibi de qarastyrylǵan. Jalpy, 16 zańǵa ózgerister men tolyqtyrýlar engiziledi.