Búgin Qazaqstan Respýblıkasy Densaýlyq saqtaý mınıstrliginiń bastamasymen Nazarbaev Ýnıversıtetinde DDU, IýNFPA, Nazarbaev Ýnıversıtetiniń Medısına Mektebi jáne «University Medical Center» korporatıvtik qory ókilderiniń, Shvesıa, Aýstralıa, Latvıa, Lıtva, Belarýs, Reseı jáne Qyrǵyzstannan sheteldik sarapshylardyń qatysýymen «Aıaly alaqan» Qazaqstan akýsherlik spesıalıstov mamandarynyń I Halyqaralyq kongresi ótti.
Forýmnyń kún tártibi búgingi tańda ana men bala densaýlyǵyn saqtaý salasynda sapaly akýsherlik kómektiń qoljetimdiligi, mamandardyń biliktiligin arttyrý, kadrlarmen qamtamasyz etý, aýrýlardyń profılaktıkasy, júktilik kezinde jáne bosanǵannan keıin áıelderdi emdeý, ońaltý, klınıkalyq praktıkany jetildirý jáne jańa tehnologıalardy engizý sıaqty ózekti baǵyttardy qamtydy, dep habarlaıdy Almaty-akshamy.kz.
Qazaqstanda ana men bala densaýlyǵyn saqtaý jónindegi memlekettik saıasat sharalary basym mindetterdiń biri bolyp tabylady jáne strategıalyq qujattarda, eldi damytýdyń memlekettik baǵdarlamalarynda, sondaı-aq halyqaralyq mindettemelerde kórsetiledi.
«Qazaqstanda júkti áıelderdi medısınalyq personaldyń bosanǵanǵa deıingi baqylaýymen qamtý 99%-dy quraıdy. Sońǵy jyldary bala týýdyń ósýi baıqalady, jyl saıyn 400 myńnan astam bala dúnıe keledi. 9 000-nan astam akýsher jyl saıyn 500 myńǵa jýyq júkti áıelderge bilikti medısınalyq kómek kórsetedi», - dedi Densaýlyq saqtaý mınıstri Aqmaral Álnazarova.
Vedomstvo basshysy ana men bala óliminiń úshten ekisiniń aldyn alýǵa múmkindik beretin sapaly akýsherlik kómektiń rólin erekshe atap ótti.
«Bizdiń elimizdiń árbir áıeline bosaný kezinde jeke bilikti akýsherlik kómek alý múmkindigi bolýy kerek. Akýsherler jumys isteıtin medısınalyq kómek úlgileri densaýlyq saqtaý salasyndaǵy nátıjelerdi jaqsartýy, pasıentterdiń qanaǵattaný dárejesin arttyrýy jáne shyǵystardy qysqartýǵa múmkindik berýi tıis», - dep atap ótti mınıstr.
Forýmda atap ótilgendeı, akýsherlik kómek júıesin odan ári nyǵaıtý úshin oqytý men daıarlyqty, laıyqty jalaqyny, sondaı-aq qaýipsiz, qoldaýshy jáne qurmetti ortada jumys isteý múmkindigin uıymdastyrýǵa ınvestısıalar qajet.
«Akýsherler densaýlyqty nyǵaıtýda, aýrýdyń profılaktıkasynda, ana men balany emdeýde jáne kútim jasaýda mańyzdy ról atqarady. Dúnıejúzilik densaýlyq saqtaý uıymynyń baǵalaýy boıynsha, meıirgerler men akýsherler búkil álem boıynsha densaýlyq saqtaý qyzmetkerleriniń jartysyna jýyǵyn quraıdy. Olardyń kóshbasshylyq qasıetterin ilgeriletý jáne kásibı daıarlyq baǵdarlamalary arqyly teń jáne laıyqty eńbek jaǵdaılaryna qol jetkizý úshin olardyń múmkindikterin keńeıtý óte mańyzdy», - dep atap ótti DDU-nyń Qazaqstandaǵy eldik ofısiniń ókili Skender Syla.
Forýmǵa qatysýshylar MSAK deńgeıindegi akýsherlerdiń erekshe rólin atap ótti, óıtkeni bul júktiliktiń alǵashqy kúnderinen bastap áıeldi baqylap, qadaǵalaıtyn, medısınalyq kómektiń barlyq baǵytyn pysyqtaıtyn alǵashqy mamandar, sondyqtan júktilikti sapaly baqylaý úshin senimdi qarym-qatynas ornatý mańyzdy.
Nazarbaev Ýnıversıtetiniń Medısına mektebiniń vıse-prezıdenti jáne dekany, doktor Massımo Pınatellı bylaı dep qosty: «Halyqaralyq akýsherler kongresi jergilikti qajettiliktermen úzdik álemdik praktıkterdi biriktirý jolyndaǵy mańyzdy qadam bolyp tabylady. Nazarbaev Ýnıversıtetiniń Medısına mektebi akýsherlik salasyndaǵy mamandar tabysty damı alatyn ortany qurýda yntymaqtasý múmkindigin maqtan tutady. Bizdiń praktıkamyzda halyqaralyq standarttar men zertteýlerdi qosa alǵanda, biz árbir ana men balaǵa kórsetiletin medısınalyq kómektiń sapasyn arttyrýǵa tyrysamyz. Bul kongres bizdiń densaýlyq saqtaý salasyndaǵy bilim berýdi ilgeriletýge degen umtylysymyzdy kórsetedi jáne barlyq múddeli taraptarǵa paıda ákeletin mýltıdısıplınalyq tásildi qoldanýǵa yqpal etedi».
Forým sarapshylary akýsherlik praktıkada júkti áıelderge patronajdyq qyzmet kórsetýdiń ámbebap progresıvti modeliniń tásilderi, otbasyn josparlaýdy damytý perspektıvalary, uryqty dıagnostıkalaý ádisteri jáne emshek sútimen qorektendirýge úıretý taqyryptarynda túrli baıandamalar jasady.
Forým alańynda Densaýlyq saqtaý mınıstri aýyldyq jáne aýdandyq aýrýhanalarda 30 jyldan astam jumys ótili bar salanyń úzdik on mamanyna qurmet gramotalaryn jáne kótermeleý retinde sanatorıılik-kýrorttyq emdelýge sertıfıkattar tabys etti.
Qorytyndysy boıynsha akýsherlik is mamandarynyń birinshi Kongresiniń qarary qabyldandy.