Qazaqstandyq semsershiler Azıa chempıonatynyń fınalyna shyqty, dep habarlaıdy Aqshamnews.kz tilshisi.
Indonezıanyń Balı aralynda ótip jatqan semserlesýden Azıa chempıonatynda qazaqstandyq erler quramasy fınalǵa joldama aldy. Ulttyq qurama sapynda Elmır Álimjanov, Vadım Sharlaımov, Erlik Sertaı jáne Rýslan Qurbanov el namysyn qorǵap jatyr.
Jarystyń pleı-off kezeńinde otandastarymyz 1/8 fınalda Túrikmenstan quramasyn 45:21 esebimen oısyrata jeńdi. Shırek fınalda Sıngapýr sportshylaryn 43:31 esebimen utyp, jartylaı fınalda Qytaı komandasyn 45:24 esebimen senimdi túrde jeńip shyqty.
Qazaqstan quramasy endi altyn júlde úshin Japonıamen synǵa túsedi. Fınaldyq kezdesý 21 maýsymǵa josparlanǵan.