Almatyda qoǵamdyq kólik júıesin damytý jáne ekologıalyq ahýaldy jaqsartý aıasynda qala avtobýstary jańartylyp jatyr. «City Bus» jekemenshik avtoparki «Skywell» markaly elektr avtobýstaryn satyp aldy, dep habarlaıdy Aqshamnews.kz tilshisi. Bul jóninde Almaty qalasynyń mobıldilik basqarmasy málimdedi.
Jolaýshylar tasymaldaýǵa arnalǵan bul tómen edendi, keń syıymdylyqty elektr avtobýstar bir qýatpen 400 shaqyrymǵa deıin júre alady. Olar dybyssyz qozǵalady, beınebaqylaý kameralary, kondısıoner, USB-qýattaǵysh porttary, júrgizýshini baqylaý júıesi jáne ózge de zamanaýı júıelermen jabdyqtalǵan.
Jańa avtobýstar 2025 jyly 22 maýsymnan bastap №19 baǵyt boıynsha, ıaǵnı «Nurkent turǵyn úı kesheni – Almaty kóshesi» aralyǵynda jolaýshy tasymaldaı bastaıdy. Sonymen qatar bul baǵyttaǵy jolǵa shyǵatyn avtobýstar sany 16-dan 18-ge deıin arttyrylmaq.
Aıta keterligi, 2024 jyly Almatynyń mobıldilik basqarmasy 600 gazben júretin avtobýs, 112 troleıbýs jáne 100 elektr avtobýsyn satyp alǵan bolatyn. Buǵan qosa, qala ishinde 3 jańa jáne qala mańyna 20 baǵyt ashyldy.
2025 jyly ákimdik taǵy 600 gazben júretin avtobýs satyp alýdy kózdep otyr. Al jekemenshik tasymaldaýshylar taǵy 118 elektr avtobýs satyp alýdy josparlaǵan.