Jıyn qorytyndysy boıynsha 20 qujat qabyldandy
Prezıdent Qasym-Jomart Toqaevtyń tóraǵalyǵymen Joǵary Eýrazıalyq ekonomıkalyq keńestiń (JEEK) bıylǵy qorytyndy otyrysy beınebaılanys rejıminde ótti, dep habarlaıdy Almaty-akshamy.kz Aqordanyń resmı saıtyna silteme jasap.
Jıyn barysynda Joǵary keńestiń Qurmetti tóraǵasy, Elbasy Nursultan Nazarbaev, Armenıa Premer-mınıstri Nıkol Pashınán, Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, Reseı Prezıdenti Vladımır Pýtın jáne JEEK-ke baqylaýshy memleketterdiń basshylary retinde Kýba Prezıdenti Dıas-Kanel Bermýdes pen Ózbekstan Prezıdenti Shavkat Mırzıóev, sondaı-aq Eýrazıalyq ekonomıkalyq komısıa alqasynyń tóraǵasy Mıhaıl Másnıkovıch sóz sóıledi.
Qasym-Jomart Toqaev otyrysty ashyp, oǵan moderator boldy. Memleket basshysy syrtqy faktorlar men karantındik shekteýlerge qaramastan, Odaq aıasyndaǵy makroekonomıkalyq kórsetkishterdiń ósim qarqynyna kóńili tolatynyn atap ótti.
«Bıylǵy 9 aıdyń ishindegi ózara saýda-sattyq kólemi 32,5 paıyzǵa artyp, 52 mıllıard dollarǵa jetti. Bul pandemıaǵa deıingi kórsetkishten 16,5 paıyzǵa joǵary. Odaqqa múshe elder arasyndaǵy eksport kólemi ulǵaıdy. Mysaly, Qazaqstan eksportynyń ósim kólemi 39 paıyz boldy. Salystyrmaly túrde alǵanda Eýrazıalyq ekonomıkalyq odaqqa múshe basqa da elderdegi eksport kólemi artqan», – dedi Memleket basshysy.
Prezıdent Odaqtyń tóraǵalyǵyna kirisken kezdegi birlesken jumystardyń bes baǵytyna, atap aıtqanda, ónerkásiptik kooperasıany kúsheıtý, ózara saýdadaǵy kedergilerdi joıý, kólik-logıstıkalyq ınfraqurylymdy damytý, sıfrlandyrý, sondaı-aq úshinshi eldermen saýda-ekonomıkalyq qatynastardy keńeıtý máselelerine toqtaldy.
Qasym-Jomart Toqaev Qazaqstannyń tóraǵalyǵy barysynda atqarylǵan birlesken jumystardyń nátıjelerine egjeı-tegjeıli toqtalyp, Eýrazıalyq ekonomıkalyq odaqqa múshe elderdiń úkimetteri men Eýrazıalyq ekonomıkalyq komısıanyń atqarǵan jumystary úshin rızashylyǵyn bildirdi.
Sonymen qatar Memleket basshysy jańa syn-qaterler jaǵdaıynda nazar aýdarýdy qajet etetin birqatar usynys aıtty.
Atap aıtqanda, Prezıdent sıfrlyq ónim men elektrondy qyzmet kórsetýge degen suranystyń zor ekenin atap ótti. Onyń pikirinshe, qazirdiń ózinde álemdik mashına jasaý naryǵynda mıkrochıpter men kompúterlik quraldardyń tapshylyǵyna qatysty júıeniń jıi isten shyǵý derekteri baıqalady.
«Osyǵan baılanysty úkimetterimizge ǵylymı-zertteý ınstıtýttaryn qatystyra otyryp, mashına jasaý salasy úshin mıkrochıpter men kompúterlik quraldar shyǵarý jónindegi birlesken kooperasıalyq jobalardy júzege asyrý máselesin pysyqtaýdy tapsyrý usynylady. Kásiporyndarymyzdyń qajettiligin tolyq qamtamasyz etýge múmkindik beretin óndiristik baza qurý qajet, al sodan keıin eksportty jolǵa qoıýǵa bolady», – dedi Qazaqstan Prezıdenti.
Sonymen qatar Qasym-Jomart Toqaev qurǵaqtaǵy tasymal máselesin damytýdy, «júrdek» transqurlyqtyq dálizderdi retke keltirýdi jáne olardyń óńirlik jáne jahandyq básekege qabilettiligin qamtamasyz etýdi ózekti sanaıdy. Osy rette Prezıdent Eýrazıalyq ekonomıkalyq odaqtyń taýar ótkizý jelisin qurýǵa qatysty elderimizdiń bastamalaryna nazar aýdardy.
«Qazaqstan keıingi eki jyl boıy Kóterme-taratý ortalyqtarynyń ulttyq jelisin qurý jumystaryn júrgizip keledi. Biz Odaqqa múshe elderdiń taýar ótkizý júıesin qalyptastyrýǵa jáne ıntegrasıalaýǵa belsendi atsalysýǵa daıynbyz», – dedi Qasym-Jomart Toqaev.
Memleket basshysy kedergilerdi, shekteýler men alyp qoıýlardy dáıekti túrde qysqartýdyń mańyzdy ekenin aıtty. Bıylǵy aqpan aıynda ótken Alqa otyrysynda Kedergilerdi bólýdiń ádistemesi bekitildi. Endi kedergilerdi qarastyryp, júıeleý úderisi, ıaǵnı olardyń túri men qoldanylý merzimi bızneske tıimdi bolý úshin reglamentteldi. Prezıdent shaǵyn jáne orta kásiporyndardy eýrazıalyq ıntegrasıa jáne kedergisiz saýda úderisine tartý isin jalǵastyrýǵa shaqyrdy.
Qasym-Jomart Toqaev Eýrazıalyq ekonomıkalyq komısıa jumysynyń tıimdiligine jáne onyń Odaqqa múshe memlekettermen ózara yqpaldastyǵyna arnaıy toqtaldy. Prezıdent bes eldiń múddesin eskere otyryp, biryńǵaı ári tutas ekonomıkalyq saıasatty qalyptastyrýdyń kóp eńbekti talap etetin kúrdeli jumys ekenin atap ótti.
«Biz bıyldan bastap Eýrazıalyq ıntegrasıany damytýdyń 2025 jylǵa deıingi strategıasyn iske asyrýǵa kiristik. Strategıanyń erejelerin qatań saqtap, Odaqtyń qazirgi quqyǵy aıasynan shyqpaý kerek dep esepteımin. Bizdiń jumysymyz ben Odaqtyń qyzmeti jalpy syrtqy seriktes elderdiń zor qyzyǵýshylyǵyn týǵyzyp otyrǵanyn eskerý mańyzdy. Bul bizge úlken jaýapkershilik júkteıdi», – dedi Memleket basshysy.
Qazaqstan Prezıdenti sózin qorytyndylaı kele, ózara qurmet pen konstrýktıvti dıalogty saqtaýǵa beıildi bolý Odaq aıasyndaǵy uzaq merzimdi ári berik yntymaqtastyqtyń negizi ekenin atap ótti.
2022 jyly Eýrazıalyq ekonomıkalyq odaq organdaryna Qyrǵyz Respýblıkasy tóraǵalyq etedi. Osyǵan oraı Memleket basshysy Qasym-Jomart Toqaev Prezıdent Sadyr Japarovty quttyqtap, alǵa qoıǵan maqsatqa sátti qol jetkizýine tilektestik bildirdi.
Keńeıtilgen formatta ótken shara sońynda Eýrazıalyq odaqqa múshe elderdiń basshylary talqylaýdy shaǵyn quramda jalǵastyrdy.