Prezıdent Qasym-Jomart Toqaevtyń referendýmǵa qatysty beıneúndeýi bastaldy.
Memleket basshysy Qasym-Jomart Toqaev aldaǵy referendýmǵa qatysty oıyn bildirdi. Ol elimizdiń óte mańyzdy ári betburysty kezeńge qadam basqaly turǵanyn aıtty, dep habarlaıdy Almaty-akshamy.kz.
"5 maýsym kúni azamattarymyz jalpyulttyq referendýmda daýys beredi. Konstıtýsıaǵa túzetýler engizý máselesi boıynsha sheshim qabyldaıdy. Bul – memlekettiń jáne búkil qoǵamnyń bolashaǵyn aıqyndaıtyn jaýapty sát. El taǵdyry eshkimdi beıjaı qaldyrmaıtyny anyq. Biz qazir barlyq salany jańǵyrtýǵa kiristik", - dedi QR Prezıdenti Qasym-Jomart Toqaev.
Prezıdent osy jolda memleketti basqarý úlgisin túbegeıli ózgertý qajettigi týyndaǵanyn aıtty. Sol sebepti, Memleket basshysy naýryz aıyndaǵy Joldaýynda saıası jańǵyrýdyń aýqymdy baǵdarlamasyn usyndy.
"Onyń basty maqsaty – elimizdi odan ári demokratıalandyrý, halyqtyń memleketti basqarý isine qatysý múmkindigin keńeıtý. Sondaı-aq, Úkimettiń tıimdiligin arttyrý. Bul ózgeristi tolyq júzege asyrsaq, yqpaldy parlamenti bar prezıdenttik respýblıka úlgisine birjola kóshemiz. Konstıtýsıalyq reforma adam quqyqtary men bostandyqtaryn qorǵaý júıesin barynsha kúsheıtedi. Sonymen birge elimizdegi saıası básekeniń ádil jáne ashyq bolýyn qamtamasyz etedi. Biz Ata zańymyzdyń otyzdan astam babyna ózgeris engizgeli otyrmyz. Onyń bári azamattarymyzdyń múddesine tolyq saı keledi. Osylaısha, memleketimizdi túbegeıli jańǵyrtamyz. Sol arqyly Ekinshi Respýblıkanyń negizin qalaımyz", - dedi Memleket basshysy.