Bilim alýshylardyń bilim jetistikteriniń monıtorıńin baǵalaýdyń ulttyq quraly RCEC halyqaralyq sapa belgisin aldy.
BBJM ulttyq quralynyń halyqaralyq akredıtasıadan ótýi onyń senimdiligin, shynaıylyǵyn jáne halyqaralyq sapa standarttaryna sáıkestigin rastaıdy, dep habarlaıdy aqshamnews.kz.
BBJM-niń barlyq kezeńderi men prosedýralary PISA, TIMSS jáne PIRLS sıaqty belgili zertteýlerde qoldanylatyn ǵylymı tásilderge negizdelgen.
«BBJM akredıtasıasynan ótý elimizdiń baǵalaý salasyndaǵy áleýetin jáne saraptamasyn arttyrýǵa múmkindik berdi. Biz BBJM transformasıasy barysynda ázirlengen negizgi qaǵıdattar men tásilderdi ulttyq bilim berý júıesin jetildirý aıasynda basqa bilim deńgeılerine engizýdi josparlap otyrmyz. Bul baǵalaý júıesiniń tutastaı damýyn jáne balalardyń bilim sapasy týraly obektıvti derekter alýdy qamtamasyz etedi», – dedi «Ahmet Baıtursynuly atyndaǵy «Taldaý» ulttyq zertteýler jáne bilimdi baǵalaý ortalyǵy» AQ Basqarma tóraǵasy Maǵjan Amanǵazy.
Sonymen qatar akredıtteý Qazaqstannyń Ortalyq Azıa óńirinde bilim berý sapasyn baǵalaý boıynsha birlesken bastamalarǵa kóshbasshylyq etýine biregeı múmkindikterdi beredi.
BBJM akredıtasıasy 7 kezeńnen turady, olar baǵalaý júıesin ázirleýdi, test suraqtarynyń bazasyn qurýdy, barlyq qatysýshylar úshin nusqaýlyq ázirleýdi, sıfrlyq platformada testileýdi ákimshilendirýdi, halyqaralyq standarttarǵa sáıkes nátıjelerdi taldaý.
Eske salaıyq, BBJM – mektep oqýshylarynyń bilim sapasyn zerdeleıtin qazaqstandyq ulttyq zertteý, ol oqý-tárbıe prosesindegi kúshti jáne álsiz tustardy anyqtaýǵa múmkindik beredi. Onyń túpki nátıjesi – bilim sapasyn arttyrý úshin ár óńirge keshendi taldaý jasaı otyryp, ádistemelik usynystar ázirleý bolyp tabylady.