Óńirlik komýnıkasıalar qyzmetinde ótken baspasóz konferensıasynda Almaty tehnologıalyq kolejiniń dırektory Erýlan Karagýlov eresek turǵyndardy jumysshy mamandyqtaryna qysqa merzimdi oqytý baǵdarlamalary týraly aıtyp ótti.
Spıkerdiń málimetinshe, qazirgi tańda eresek turǵyndardy daıarlaý, qaıta daıarlaý jáne biliktiligin arttyrý boıynsha qysqa merzimdi baǵdarlamalar júzege asyrylýda, dep habarlaıdy aqshamnews.kz.
Bul baǵdarlamanyń uıymdastyrýshysy Almaty qalasy ákimdiginiń qoldaýymen Jumyspen qamtý jáne áleýmettik baǵdarlamalar basqarmasy.
«Qazirgi tańda suranysqa ıe mamandyqtardyń tizbesi ázirlenýde, ár kolej óz múmkindikterine sáıkes mamandyqtar boıynsha oqytýdy júzege asyrady. Bul jumysty «Atameken» óńirlik kásipkerler palatasy úılestiretin bolady. Kolejderde oqytý 1 aıdan 6 aıǵa deıin sozylady. Mysaly, bizdiń kolej eresekterdi aspaz jáne kondıter mamandyǵy boıynsha daıyndaıdy. Sonymen qatar, mektep pen mektepke deıingi bilim berý mekemelerine aspaz daıyndaýmen aınalysyp jatyrmyz», - dedi Erýlan Karagýlov.